Germanııada áleýmettik jarnalar 2035 jylǵa qaraı jalaqynyń jartysyna jetýi múmkin

ASTANA. KAZINFORM — Germanııada aldaǵy on jylda medıtsınaǵa, kútimge, zeınetaqyǵa jáne jumyssyzdyq boıynsha járdemaqylarǵa arnalǵan áleýmettik aýdarymdar jalaqynyń shamamen 50 paıyzyna deıin ósýi múmkin, dep habarlaıdy BILD. 

Mundaı boljamdy Berlındegi IGES ınstıtýty daıyndady.

Qazirgi ýaqytta áleýmettik saqtandyrýǵa brýtto jalaqynyń 42,7 paıyzy jumsalady (onyń jartysyn jumys berýshi tóleıdi), alaıda reformalar júrgizilmese, bul júkteme odan ári arta beredi.

Zertteý avtorlarynyń esepteýinshe, 2035 jylǵa qaraı mıllıondaǵan jumysshynyń qolyna alatyn taza tabysy edáýir azaıady.

Mysaly, brýtto jalaqysy 2500 eýro bolatyn qyzmetker úshin aı saıynǵy áleýmettik aýdarymdar 533 eýrodan 625 eýroǵa deıin ósip, jylyna shamamen 1100 eýroǵa artýy múmkin. Al 3500 eýro tabysy barlar úshin jyldyq ósim shamamen 1530 eýro, 4500 eýro alatyndar úshin 2000 eýroǵa jýyq soma.

— Bul — barlyq múddeli tarap úshin qajetti reformalardy tez arada bastaýǵa sońǵy ári óte mańyzdy dabyl sıgnaly, — dedi DAK saqtandyrý kompanııasynyń basshysy Andreas Shtorm BILD basylymyna bergen suhbatynda.

Zertteý avtorlarynyń esepteýine sáıkes, 2027 jyldyń ózinde medıtsınalyq saqtandyrý júıesindegi tapshylyq shamamen 12 mlrd eýro bolýy múmkin.

Aıta ketelik 2025 jyldyń sońyna qaraı Germanııada jumyssyzdardyń sany artty.