Germanııada áleýmettik járdemaqyny zańsyz ıelenetin «mafııaǵa» qarsy kúres bastaldy

ASTANA. KAZINFORM – Germanııadaǵy jumyspen qamtý ortalyqtary bazalyq áleýmettik járdemaqyny (Bürgergeld) zańsyz ıelenýmen aınalysatyn qylmystyq toptarǵa qarsy sharalardy kúsheıtýde, dep habarlaıdy DW.

Málimetke sáıkes, alaıaqtyq syzbalar negizinen Shyǵys Eýropadan – Bolgarııa men Rýmynııadan kelgen adamdardy tartý arqyly júzege asyrylady. Olar úshin tómen jalaqymen jalǵan eńbek sharttary rásimdeledi. Keıin bul adamdar tabysty tolyqtyrý úshin járdemaqy alýǵa ótinish beredi, alaıda alynǵan qarajattyń basym bóligin qylmyskerlerge berýge májbúr bolady.

Tagesschau atap ótkendeı, mundaı shemalar kóbine arzan ári eski turǵyn úıleri kóp qalalarda óristeıdi. Sebebi jalǵa berýshiler men jumys berýshiler keıde bir adamǵa tıesili nemese tyǵyz baılanysta bolady.

Eldiń Eńbek mınıstrliginiń dereginshe, eń kóp faktiler Rýr aımaǵynda – Dýısbýrg pen Gelzenkırhen qalalarynda tirkelgen. Máselen, Gelzenkırhen qalasy bıýdjetiniń jartysynan astamy áleýmettik tólemderge jumsalady.

Jumyspen qamtý ortalyqtarynyń derekterine súıensek, alaıaqtyqtyń túrli nysandary bar. Buǵan EO-ǵa múshe elderdiń kez kelgen azamaty jumys istep, sol elde turyp jatsa, áleýmettik kómekke ótinish bere alady. 2024 jyly osyndaı 421 jaǵdaı tirkelse, bıylǵy mamyr aıyna deıin 225 oqıǵa anyqtalǵan.

Eńbek mınıstri Berbel Bas mundaı «mafıozdyq qurylymdardy» joıý qajettigin málimdedi. Vedomstvo qujattardy qaıta tekserý jáne úshinshi taraptan aqparat alý sııaqty sharalardy qoldanýda.

– Adal salyq tóleýshilerdiń múddesi úshin bul másele qarastyrylyp, naqty sharalar qabyldanýy tıis, – dedi Dýısbýrgtiń oberbýrgomıstri Seren Lınk.

Onyń aıtýynsha, memleket «azý tisin kórsetýi kerek».

Eske salaıyq, buǵan deıin Germanııa prokýratýrasynda mıllıondaǵan qaralmaǵan ister jınalyp qalǵany týraly jazyldy.