Germanııada áleýmettik járdemaqy qysqaryp, sheteldikterge tólemder azaıýy múmkin
ASTANA. INFORMSPORT — Germanııanyń Іshki ister mınıstri Aleksander Dobrındt «bıýrgergeld» dep atalatyn azamattyq járdemaqy tólemderi tym joǵary dep esepteıdi.
— Ótken zań shyǵarý kezeńinde járdemaqynyń bazalyq mólsherlemesiniń edáýir artýy shyǵynnyń aıtarlyqtaı ósýine alyp keldi. Qazirgi bazalyq tólem kólemi tym joǵary dep sanaımyn, — dedi ol.
Onyń aıtýynsha, járdemaqy tek eń tómengi kúnkóris deńgeıin qamtamasyz etip, odan aspaýy tıis.
2024 jyldan bastap jalǵyz turatyn eresek adam úshin «bıýrgergeldtiń» standartty mólsheri aıyna 563 eýro. Jubaıy nemese seriktesi bar adamdarǵa, sondaı-aq balalarǵa tólenetin mólsherleme tómenirek. Eń tómengi tólem — bes jasqa deıingi balalar úshin aıyna 357 eýro.
Dobrındtiń aıtýynsha, qazirgi ýaqytta Germanııa jyl saıyn «bıýrgergeldke» 50 mıllıard eýro jumsaıdy jáne ol bıýdjet qarajatyn únemdeýge qol jetkizýdi kózdep otyr. Qazir bul járdemaqyny shamamen 5,3 mıllıon adam alady.
Shilde aıynan bastap «bıýrgergeldtiń» ornyna jańa bazalyq áleýmettik qamsyzdandyrý júıesi engiziledi. Járdemaqy alýshylar úshin qatań talap kúshine enedi: eger olar jumyspen qamtý ortalyqtarymen yntymaqtastyq jasamasa, tólemder burynǵyǵa qaraǵanda erterek jáne kóbirek qysqartylady.
Budan bólek, «bıýrgergeld» tólemderin Eýropalyq Odaq azamattary úshin de qysqartý máselesi qarastyrylýy múmkin. Maqsat — ásirese Ońtústik-Shyǵys Eýropadan kelgen azamattardyń Germanııada birneshe aı jumys istegennen keıin-aq járdemaqy alý quqyǵyna ıe bolatyn jaǵdaılardyń aldyn alý.
Sondaı-aq, eger Eýroodaq azamattarynyń balalary ózderiniń shyqqan elinde tursa, Germanııada turatyn ata-analarǵa tólenetin balalar járdemaqysyn qysqartý múmkindigi de qarastyrylyp jatyr. Qazirgi kezde olar Germanııada balalarymen birge turatyn otbasylarmen birdeı kólemde járdemaqy alady.
Usynylyp otyrǵan sharalardyń maqsaty — áleýmettik memleketti «alaıaqtyqqa azyraq osal» etý. Alaıaqtyq shemalardy anyqtaý úshin memlekettik organdar arasyndaǵy tsıfrlyq derekter almasýdy jetildirý jáne jasandy ıntellektini paıdalaný josparlanyp otyr.
Aıta ketelik Germanııanyń ár úshinshi turǵynynyń jasy 60-tan asqan.
