Germanııada 46 mıllıon adam jumys isteıdi, taǵy 749 myń jumysshy kerek

Birikken Germanııada jumysshylar sany buryn-sońdy qazirgideı joǵary bolmaǵan: 46 mıllıon adam. Bul - rekord. Byltyrǵy jylmen salystyrǵanda Germanııa Federatıvtik respýblıkasynda eńbek etetinder sany 291 myń adamǵa artty. Kazinform bul týraly DW basylymyna silteme jasap habarlaıdy.

Jumyspen qamtý odan da kóp bolýy múmkin, sebebi qazir elde 749 myń bos jumys orny bar.

Nemis jumys berýshileri ortasha eseppen bes aıdan beri laıyq úmitkerdi izdep jatyr, sheteldik mamandar da qarastyrylady. Ásirese densaýlyq saqtaý, qurylys jáne, árıne, IT-ındýstrııa mamandary qajet. Elde kólik júrgizýshi men tárbıeshiler jetispeıdi.

Bul - sheteldikter úshin jaqsy jańalyq. Sebebi Germanııa ekonomıkasy bir orynda turyp qalǵanyna qaramastan onda jumys tabý múmkindigi joǵary. El úkimeti qazir sheteldikterdi tartýdy kózdep otyr. Bılik ókilderi elde turatyn jáne osy jerden pana suraǵan shet el azamattarynyń jumysqa ornalasý sharttaryn jeńildetken. Munda tipti deportatsııany soza turýdy suraǵan adamdardy da jumysqa alýǵa ruqsat berildi. Olardyń sany shamamen 225 myń adam.