Germanııada 300 jolaýshysy bar júrdek poıyz júk kóligimen soqtyǵysty

ASTANA. KAZINFORM – Oqıǵa Gambýrg-Harbýrg-Mashen (Tómengi Saksonııa) temirjol ýchaskesinde boldy, dep habarlaıdy BILD. 

Deutsche Bahn kompanııasynyń ICE júrdek poıyzy shuǵyl tejelgenine qaramastan joǵary jyldamdyqpen júk kóligine soǵyldy.

Órt sóndirý qyzmeti ókiliniń aıtýynsha, kem degende eki adam zardap shekti. Basqa aqparat quraldary jaraqat alǵandardyń sany kóbirek bolǵanyn, sonyń ishinde júk kóliginiń júrgizýshisi de bar ekenin, kem degende bir adam aýyr halde jatqanyn habarlady. 

Oqıǵa ornynda qutqarý qyzmeti, onyń ishinde jedel járdem tikushaǵy jumys istep jatyr. 

Jol apaty Gambýrgtyń Rennenbýrg aýdanynda bolǵan. Apat ornynda synyqtar kóp, júk kóligi qatty zaqymdanǵan.

Hamburger Abendblatt basylymynyń habarlaýynsha, poıyz jaqyndaǵan kezde júk kóliginiń artqy jaǵy relste bolǵan dep boljanyp otyr. Sondaı-aq júk kóliginiń temirjol bólshekterin shyǵaratyn kompanııaǵa tıesili ekeni habarlandy. 

Basylymnyń aqparatynsha, júk kóligi tirkemesinde tasymaldanǵan metall bólshekter temir jol boıyna shashylyp ketken. Polıtsııa jolaýshylardy evakýatsııalaýdy uıymdastyryp, olardy apat ornynan tasymaldaý úshin avtobýstar shaqyrdy.

Buǵan deıin Gvatemalada jolaýshylar avtobýsy kópirden qulap, kem degende 51 adam qaza tapqanyn jazǵan bolatynbyz. Al keshe Arızona áýejaıynda eki ushaq soqtyǵysyp, bir adam qaza tapty.