Germanııada 23 naýryz kúni jalpyulttyq ereýilge baılanysty dárihanalar jabylady
ASTANA. KAZINFORM – 23 naýryz kúni tutas Germanııa aýmaǵynda dárihanalar óz qyzmetkerleriniń jalpyulttyq ereýiline baılanysty ýaqytsha jabylady. Shamamen 160 myńnan astam adam bul ereýilge qatysatyny belgili boldy. Bul týraly Bild basylymy habarlady.
Basylymnyń málimetinshe, dárihana qyzmetkerleri «sozylmaly qarjylandyrý tapshylyǵyna» narazylyq bildirip otyr. Olar Berlın, Gannover, Dıýsseldorf jáne Mıýnhen qalalarynda sherýge shyǵady.
– Germanııadaǵy dárihanalar jaǵdaıy, dári-dármekpen qamtamasyz etý jáne halyqqa medıtsınalyq qyzmet kórsetý máselesi burynnan beri kúrdeli kúıde, — dep málimdedi Germanııa dárihanalary federaldyq qaýymdastyǵynyń (ABDA) basshysy Tomas Praıs.
Onyń aıtýynsha, dárihana qyzmetkerleriniń jalaqysy sońǵy ret 13 jyl buryn kóterilgen, al osy ýaqyt ishinde qosymsha shyǵyndar 65 paıyzdan joǵary ósken.
Sondaı-aq Praıstyń deregine sáıkes, 2013 jyldan beri Germanııadaǵy dárihanalardyń jalpy sanynyń shamamen 20 paıyzy jabylǵan.
Eske sala ketsek, ótken aıda Germanııadaǵy jumyssyzdar sany 3 mıllıonnan asqanyn jazdyq.
Sondaı-aq Germanııadaǵy áleýmettik ahýal kúrdelenip,13 mıllıonnan asa adam kúnkóris qıyndyǵyn kórip otyr.
