Germanııada 2020 jyldan beri alys baǵyttaǵy poıyz reısteriniń toqtatylýy eki ese artty
ASTANA. KAZINFORM – Germanııada alys baǵyttaǵy temirjol reısteriniń toqtatylý kórsetkishi sońǵy tórt jylda eki esege jýyq ósti. 2024 jyly elde alys qashyqtyqqa qatynaıtyn poıyzdardyń shamamen ár jıyrmasynshysy toqtaǵan, dep habarlaıdy DW.
Al poıyzdardyń nebári 59 paıyzy ǵana belgilengen ýaqytynda mejeli jerge jetken.
Federaldyq jeliler agenttiginiń 2024 jylǵy temirjol tasymaly naryǵyna arnalǵan taldaýyna sáıkes, alys baǵyttaǵy poıyzdardyń dál ýaqytynda kelý kórsetkishi keminde 21 jyldaǵy eń tómen deńgeıge túsken.
Eýroodaq normalaryna sáıkes, poıyzdyń 5 mınýttan artyq keshikpeýi ýaqytynda kelgen dep esepteledi. Alaıda 2024 jyly mundaı talapqa tek 59 paıyz reıs qana saı kelgen. Bul – Deutsche Bahn kompanııasynyń sońǵy jyldardaǵy eń nashar nátıjesi.
Saraptamaǵa sáıkes, 2020 jylmen salystyrǵanda alys baǵyttaǵy reısterdiń toqtatylý úlesi 2,5 paıyzdan 4,8 paıyzǵa deıin ósken. Statıstıkaǵa tek Deutsche Bahn ǵana emes, ózge de temirjol tasymaldaýshylary engizilgen. 2024 jyly alys baǵyttaǵy jolaýshylar tasymaly naryǵynyń 93 paıyzy Deutsche Bahn-ǵa tıesili bolǵan.
Kompanııanyń óz málimeti boıynsha, ótken jyly DB alys baǵyttaǵy reısteriniń 4 paıyzy toqtatylǵan. Onyń jartysyna jýyǵy temirjolshylardyń ereýilderine baılanysty bolǵan.
Sonymen qatar jol ústinde jartylaı toqtatylǵan reıster sany da artqan. 2024 jyly alys baǵyttaǵy tasymaldardyń 7,3 paıyzy mejeli jerge jetpeı toqtaǵan. Al 2020 jyly bul kórsetkish 4,2 paıyzdy quraǵan.
Die Welt sarapshylary reısterdiń jıi toqtatylýyna birneshe negizgi faktor áser etip otyrǵanyn atap ótedi. Olardyń qatarynda kadr tapshylyǵy, temirjol ınfraqurylymyndaǵy qurylys jumystary, ereýilder jáne tehnıkalyq aqaýlar bar.
Osy qıyndyqtar aıasynda Deutsche Bahn kompanııasynyń basshysy Evelın Palla 2025 jylǵy 1 qazannan bastap qyzmetke kirise otyryp, temirjol salasyndaǵy «tarıhtaǵy eń aýqymdy transformatsııalardyń birin» júrgizýdi josparlap otyrǵanyn málimdedi. Onyń aıtýynsha, basqarma quramyn qysqartý jáne kompanııany basqarýdy ortalyqsyzdandyrý kózdelip otyr.
Alaıda sarapshylardyń pikirinshe, jaqyn jyldary temirjol jumysynyń aıtarlyqtaı jaqsarýy kútilmeıdi. Die Welt dereginshe, mamandar 2029 jylǵa deıin alys baǵyttaǵy poıyzdardyń ýaqytyly kelý kórsetkishi 70 paıyzǵa jetedi dep boljam jasap otyr.
Aıta keteıik, Germanııada biraz salada jumys oryndary qysqarady.