Germanııada 16 jasqa deıingi balalarǵa TikTok pen Instagram-ǵa tyıym salý usynyldy

ASTANA. KAZINFORM — Germanııada 16 jasqa tolmaǵan balalarǵa TikTok pen Instagram-dy paıdalanýǵa tyıym salý máselesi talqylanyp jatyr, dep habarlaıdy DW.

Osyndaı bastamany Germanııanyń burynǵy bilim jáne ǵylym mınıstri, «Jasyldar» partııasynyń saıasatkeri Djem Ozdemır kóterdi.

Onyń aıtýynsha, balalarǵa smartfon men medıa quraldaryn «jaýapkershilikpen» qoldanýdy úırengenge deıin áleýmettik jelilerge qol jetkizýdi shekteý qajet.

— Biz jasóspirimderge júrgizýshi kýáliginsiz kólik júrgizýge ruqsat etpeımiz. Ol úshin arnaıy júrgizý sabaqtary bar. Biz dál osyndaı tásildi áleýmettik jelilerge de qoldanýymyz kerek, — dedi Ozdemır dpa agenttigine bergen suhbatynda.

Die Zeit gazetiniń saýalnamasyna sáıkes, Germanııadaǵy eresek turǵyndardyń kópshiligi bul sharalardy qoldaıdy. Ásirese bul bastamaǵa 18 ben 24 jas aralyǵyndaǵy jastar jıi kelisedi, olar ózderi de ósip kele jatqanda áleýmettik jelilerde kóp ýaqyt ótkizgen.

Alaıda Germanııanyń muǵalimder qaýymdastyǵy balalarǵa arnalǵan áleýmettik jelilerge tyıym salý ıdeıasyn «júzege asyrý qıyn ári nátıjesiz shara» dep esepteıdi.

— Facebook, Instagram jáne TikTok — bul qazirgi shynaıy ómirdiń bir bóligi, jastar osy álemde baǵyt tabýy kerek. Tyıym salý kómektespeıdi, — dedi uıym prezıdenti Shtefan Dıýll.

Osyǵan deıin Irlandııada paıdalanýshy týraly derekterdi bóliskeni úshin TikTok-qa aıyppul salyndy.

Sondaı-aq, Túrkııada YouTube, X, TikTok, Instagram jelilerine shekteý qoıylǵany belgili boldy.

Oqý-aǵartý mınıstrligi TikTok-ty shekteýge qatysty pikir bildirdi.