Germanııada 116 metrlik ǵımarat jaryldy
ASTANA. QazAqparat - Germanııanyń Frankfýrt qalasynda jarylǵysh zattyń kómegimen 116 metrlik záýlim ǵımarat ysyryldy. Halyq arasynda «ýnıversıtettik munara» atalyp ketken ǵımarattyń qulaǵan sátin 10 myńnan astam adam tamashalady, dep habarlaıdy Bigpicture.ru.
Salmaǵy 50 tonnalyq ǵımarat 950 keli jarylǵysh zatynyń kómegimen sanaýly sekýndtyń ishinde jaryldy. Ýnıversıtettik munara ǵımaraty 1972 jyly Maındaǵy Frankfýrt qalasy eldiń iskerlik ortalyǵyna aınalǵanǵa deıin salynǵan. 2,5 myń stýdentke arnalyp turǵyzylǵan 38 qabattyq nysan sol kezde qaladaǵy eń záýlim ǵımarat bolyp sanalǵan-dy.
Alaıda ýaqyt óte nysan toza bastady. Mysaly, ondaǵy jeti jedel saty stýdentterdi tasymaldaýǵa qaýqary jetpeı, tipti 15 mınýtqa deıin kúttirip qoıatyn boldy. Osyǵan oraı, ony yrysyrý týraly sheshim qabyldanyp, jumys ótken jyldyń shilde aıynda bastalyp ketti. Dańǵyrdan sharshaǵan kórshi aýdandardyń turǵyndary ysyrý jumystary tym baıaý júrip jatyr dep shaǵym aıtqan. Sol sebepti ǵımarat jarylǵysh zattyń kómegimen qulatyldy.
Jumysshylar aınalany shań-tozańnan saqtaý úshin ǵımaratpen birge 1000 lıtrlik tsısternany qosa jardy. Aıta keterligi, buǵan deıin Eýropada birde-bir bıik ǵımarat dál osyndaı ádispen ysyrylmap edi. Endi ysyrylǵan jerge eki záýlim ǵımarat boı kóterip, onda túrli keńseler ornalasady dep josparlanyp otyr.
