Germanııa jańa áskerı qyzmet týraly zańdy maquldady

ASTANA. KAZINFORM — Germanııa Býndestagy (parlament) jańa áskerı mindet engizýdi qoldap daýys berdi. Zań 2008 jyly jáne odan keıin týǵan barlyq er adamdar úshin mindetti áskerı esepke tirkelýdi qarastyrady. Alaıda áskerı qyzmetke barý sheshimi erikti túrde qabyldanady, dep jazady AZERTADJ.

Agenttik Tagesschau jańalyq portalyna silteme jasap habarlaǵandaı, birneshe aılyq talqylaýlardan keıin Býndestag býndesverdi (Germanııa qarýly kúshteri) kúsheıtýge baǵyttalǵan jańa zań jobasyn qabyldady. Zań qarýly kúshterdi negizinen eriktiler esebinen keń kólemde ulǵaıtýdy kózdeıdi. Eger rekrýttar jetispese, tıisti zań qabyldanǵan soń mindetti qyzmet keıinirek engizilýi múmkin. Zań jastardy medıtsınalyq tekserýden ótýge mindetteıdi jáne áskerı esepti qalpyna keltiredi.

Áskerı qyzmet keminde alty aıǵa sozylady jáne aıyna keminde 2,6 myń eýro (salyq ustalǵanǵa deıin) tólenedi. 12 aıdan kóp qyzmet etetinder úshin qosymsha jeńildikter qarastyrylǵan.

Kelesi jyldan bastap 2008 jyly jáne odan keıin týǵan barlyq uldar men qyzdarǵa jeke anketa jiberiledi. Er adamdar anketany mindetti túrde toltyrýy kerek, al qyzdarǵa tańdaý quqyǵy beriledi, sebebi Germanııanyń Negizgi zańy áıelderge mindetti áskerı qyzmetti qarastyrmaıdy.

Zań jobasyn Federaldyq keńes te maquldaýy tıis, onyń otyrysy 19 jeltoqsanǵa josparlanǵan. Zań 2026 jyldyń qańtarynda kúshine enedi.

Aıta keteıik, áskerı mindet 2011 jyly toqtatylǵan edi. Osy zańnyń maqsaty — 2035 jylǵa qaraı qyzmettegi áskerı qyzmetkerler sanyn 255–270 myń adamǵa deıin arttyrý. Qazan aıynyń sońyndaǵy málimet boıynsha, olardyń sany 184 myńnan sál asqan. Sonymen qatar, taǵy 200 myń rezervıst qosý josparlanyp otyr.

Buǵan deıin belgisiz bireýler Germanııadaǵy Býndesverden 20 myń oq-dári urlap ketkenin jazǵanbyz.