Germanııa jaǵalaýynda órkeshti kıt qaırańda qalyp qoıdy
ASTANA. KAZINFORM – Germanııanyń Nındorf jaǵalaýynda órkeshti kıtti qutqarý operatsııasy ekinshi táýlikke jalǵasyp jatyr, dep habarlaıdy DW.
Uzyndyǵy shamamen 10 metr bolatyn jas kıt Lıýbek shyǵanaǵyndaǵy qumdy qaırańǵa turyp qalǵan. Aımaq Shlezvıg-Golshteın federaldyq jerine qaraıdy. Mamandar janýardy teńizge qaıta shyǵara almaı jatyr. Tipti túngi tasqynnyń ózi kıttiń ózdiginen júzip ketýine jetkiliksiz bolǵan.
Sarapshylardyń aıtýynsha, jas atalyq kıt kóshý kezinde baǵytynan jańylǵan bolýy múmkin.
Sonymen qatar alańdatatyn taǵy bir boljam bar, janýar álsiregen nemese aýrý bolýy yqtımal. Keı jaǵdaılarda kıtter álsiregen kezde ádeıi taıaz sýǵa baryp, demalýǵa tyrysady. Tabıǵatty qorǵaý jónindegi Sea Shepherd uıymynyń ókilderi janýardyń jaǵdaıy saǵat saıyn nasharlap bara jatqanyn aıtty.
Qutqarý jumystary kıttiń salmaǵynyń aýyrlyǵyna baılanysty qıyndyq týdyryp otyr. Ony tereń sýǵa burý áreketteri jasalǵan, tipti qaıyqtarmen tolqyn jasap kórýge de tyrysqan, biraq kıt qaıtadan sol ornyna qaıtyp kelgen.
Janýardyń mańynan balyq aýlaý torynyń qaldyqtary tabylǵan. Onyń bir bóligi alynǵanymen, dál osy tor kıttiń turyp qalýyna sebep bolýy múmkin degen boljam bar.
Qaýipsizdik maqsatynda jaǵalaý qorshaýǵa alynyp, polıtsııa adamdardan jaqyndamaýdy surady.
Mamandardyń aıtýynsha, sýy sýyq ári tuzdylyǵy tómen Baltyq teńizinde kıttiń tiri qalý múmkindigi az.
Aıta keteıik, muhıt túbinde kıtterdiń óleksesimen qorektenetin tirshilik ıeleri bar.
