Germanııa úkimeti Gaza sektory balalaryn qabyldaýdan bas tartty
ASTANA. KAZINFORM — Germanııa bıligi Gannover ákimshiliginiń Gaza sektory men Izraılden 20-ǵa deıin naýqas jáne jaraqat alǵan balany emdeýge qabyldaý týraly usynysynan bas tartty, dep habarlaıdy TASS.
GFR Іshki ister mınıstrliginiń hatynda soǵys qımyldaryn toqtatýdaǵy ilgerileýshilikke qaramastan, anklavtaǵy jaǵdaı «óte kúrdeli jáne boljaý múmkin emes» kúıde qalyp otyrǵany aıtylǵan. Mınıstrlik balalardyń saparyn uıymdastyrý olarmen birge baratyn otbasy músheleriniń jeke basyn jáne qaýipsizdigin anyqtaýdan bastap, shyǵyndy jáne olardyń keri qaıtýyn baǵalaýǵa deıingi birqatar kúrdeli protsedýrany qamtıtynyn atap ótti.
Gannover meri Belıt Onaı federaldy úkimettiń sheshimine ókinish bildirip, bas tartýdy «kóńil qaldyratyn jáne túsiniksiz» dep atady. Onyń aıtýynsha, qala óte osal jaǵdaıǵa túsken balalardy qabyldaýǵa daıyn. Bul bastamany Bremen, Dıýsseldorf, Leıptsıg, Bonn, Frankfýrt, Kıl bıligi jáne Tómengi Saksonııanyń protestanttyq shirkeýleri de qoldady.
Federaldy úkimettiń ustanymy naýqastardy shetelge tasymaldamaı, zardap shekkenderge jergilikti jerde medıtsınalyq kómek kórsetýge basymdyq berý bolyp qalyp otyr.
Eske sala ketsek, HAMAS Izraılge taǵy eki tutqynnyń denesin tapsyratynyn jazǵan bolatynbyz.