Germanııa Túrkııadaǵy áýe jáne zymyranǵa qarsy qorǵanys mıssııasyn uzartty
ASTANA. KAZINFORM — Germanııa NATO mıssııasy aıasynda Túrkııada «Patriot» áýe qorǵanys júıesin qoldaný merzimin 2027 jylǵy sáýirge deıin uzartty, dep habarlaıdy Kazinform agenttiginiń Ankaradaǵy menshikti tilshisi.
Bıyl maýsym aıynda Germanııanyń «Patriot» áýe qorǵanys bólimshesi Túrkııanyń Malatıa qalasyna ornalastyrylǵan bolatyn. Endi nemis áskerı qyzmetshileri bul elde 2027 jylǵy sáýirge deıin qyzmet etedi. Bólimshe quramynda Býndesverdiń 150-ge jýyq áskerı qyzmetshisi bar.
NATO janyndaǵy Germanııa ókilderiniń málimdeýinshe, bólimshe uıymnyń áýe keńistigin qorǵaý jáne zymyran shabýylyna qarsy qorǵanysyn kúsheıtýge úles qosyp otyr. Bastapqy jospar boıynsha nemis áskerı qyzmetshileri Túrkııada 2026 jylǵy qyrkúıekke deıin qalýǵa tıis edi.
«Patriot» júıesi Iran qatysqan qaqtyǵysqa baılanysty NATO-nyń zymyran shabýyldarynan qorǵanysyn kúsheıtý úshin Túrkııaǵa ornalastyryldy. Germanııa áskerı qyzmetshileri ony eldiń shyǵysynda NATO-nyń áýe qorǵanys qurylymynyń quramynda paıdalanyp otyr.
«Patriot» — ushaqtardy, qanatty zymyrandardy jáne ballıstıkalyq zymyrandardyń keıbir túrlerin anyqtap, olardyń jolyn kesýge arnalǵan amerıkalyq áýe qorǵanys júıesi.
Buǵan deıin Irannyń Túrkııaǵa «zymyran shabýyldaryn» tekserý úshin birlesken top qurýdy usynǵany týraly habarlaǵan edik.
