Germanııa turǵyny koronavırýsqa qarsy vaktsınany 87 ret aldy

BRıÝSSELЬ. QazAqparat – Germanııa turǵyny COVID-19-ǵa qarsy ekpeni 87 ret alǵan. Bılik osylaısha atalǵan azamat vaktsınalaý sertıfıkattaryn zańsyz satqan dep sanaıdy, dep habarlaıdy QazAqparat menshikti tilshisi.

Frei Presse nemis gazetiniń jazýynsha, 61 jastaǵy er adam Saksonııa jáne Saksonııa-Anhalt shyǵys-german jerlerindegi birneshe vaktsınalaý ortalyqtaryna barǵan. Ol kúnine úsh vaktsınadan alǵan bolýy múmkin dep jazdy nemis basylymy.

Er adam vaktsınalaý ornyna kelgen saıyn, ol ózimen birge vaktsınatsııa týraly jańa taza qujat alyp kelip júrgen. Ekpe alǵannan keıin ol qujattan vaktsına nómirleri týraly aqparaty bar betterdi alyp tastaǵan. Blankini vaktsınany saldyrǵysy kelmeıtinderge satqan.
Sondaı-aq, er adam vaktsınatsııa úshin óziniń naqty aty-jóni men týǵan kúnin paıdalanyp, biraq medıtsınalyq saqtandyrý kartasyn kórsetpesten tirkelgen.
Drezden qalasyndaǵy egý ortalyǵyndaǵy qyzmetkerlerdiń biri bul adamdy tanyǵan soń kúdiktene bastaǵan. Kelesi joly ol Eılenbýrg qalasyndaǵy ekpe ortalyǵyna kirgen kezde qyzmetkerler polıtsııa shaqyryp, er adam ustalǵan.
Jýrnalıster bul jaǵdaı Germanııanyń densaýlyq saqtaý júıesindegi olqylyqtardy kórsetti dep jazdy. Munda medıtsınalyq aqparat negizinen tsıfrlanbaǵan jáne ortalyqtandyrylǵan júıede saqtalmaǵan.
«Koronavırýsqa qarsy vaktsınalardyń ulttyq tizilimi bul jaǵdaıdy dereý anyqtaı alar edi», - dedi Saksonııa memlekettik medıtsınalyq qaýymdastyǵynyń ókili Knýt Keler gazetke.
Germanııada ekpe alýǵa quqyly halyqtyń 75%-dan astamy tolyǵymen vaktsınalansa, 58%-ǵa jýyǵy qaıtadan ekpe alǵan.

Avtory: Arnur Rahymbekov