Germanııa turǵyny eń uzaq týǵan kún toılaýdan rekord ornatty
ASTANA. QazAqparat - Nemis azamaty Sven Hagemaıer erekshe oqıǵa uıymdastyryp, sol arqyly Gınnestiń rekordtar kitabyna endi. Ol saǵat beldeýleri boıynsha júrip, eń uzaq týǵan kún merekesin ótkizgen, dep habarlaıdy The Telegraph.
Ol 26 jasqa tolýyn toılaýdy Jańa Zelandııanyń Oklend qalasynda bastap, sodan keıin Avstralııanyń Brısben qalasyna bardy. Nemis azamaty týǵan kúnin atap ótýdiń kelesi orny retinde Brısben qalasynan 20 saǵattyq joldaǵy Gavaı araldaryn tańdaǵan. Mamandar esepteý kezinde týǵan kún ıesiniń túrli saǵattyq beldeýlerde jumsaǵan ýaqyty men saǵat aıyrmashylyǵyn sanady.
Hagemaıer ushýǵa 13 saǵat, 10 mınýt ýaqytyn ketirdi, dep atap ótti basylym. Osy tektes jetistigi 35 saǵat pen 20 mınýtty quraǵan. Nemis azamaty rekordtqa 2014 jyly qol jetkizgen, biraq nomınanttar tizimine enbeı qalǵan. Onyń týǵan kúndi eń uzaq atap ótý oqıǵasy týraly jazba Gınnestiń rekordtar kitabyna tek 2015 jyly enip otyr.
