Germanııa tátti sýsyndarǵa salyq engizedi

ASTANA. KAZINFORM — Germanııa úkimeti semizdik deńgeıiniń ósimin tejeý jáne densaýlyq saqtaý júıesine túsetin aýyrtpalyqty azaıtý maqsatynda 2028 jyldan bastap densaýlyq saqtaý reformasy paketi aıasynda tátti sýsyndarǵa salyq engizýge nıetti, dep habarlaıdy Reuters. 

Bul qadam elderdi aldaǵy 10 jylda tátti sýsyndar, alkogol men temeki ónimderiniń baǵasyn salyq salý esebinen 10%-ǵa kóterýge shaqyrǵan Dúnıejúzilik densaýlyq saqtaý uıymynyń (DSU) usynystaryna sáıkes keledi. 

DSU málimetinshe, qazirgi ýaqytta 100-den astam el qantty sýsyndarǵa salyq salyp otyr.

Forsa uıymynyń aqpan aıynda jarııalanǵan saýalnamasy nemisterdiń shamamen 60%-y salyqty qoldaıtynyn kórsetti. 

Bul salyqtan túsetin jyldyq kiris 450 mln eýro (527 mln dollar) aýrýlardyń aldyn alý jáne densaýlyqty nyǵaıtý baǵdarlamalaryn qarjylandyrýǵa jumsalady.

Osy arada lobbıshiler qant baǵasyn qymbattatý eshbir elde salmaǵy artyq adamdar úlesin azaıtqan joq dep málimdep, bul josparǵa qarsy shyǵyp otyr. 

Eske salsaq, Ulybrıtanııa on jyl buryn osyǵan uqsas qant salyǵyn engizgen bolatyn, al ótken jyly ol qaptalǵan sút sýsyndaryna da qatysty qoldanylǵan bolatyn.

Osyǵan deıin Abý-Dabıde fastfýd jarnamasyna tyıym salynǵanyn jazdyq.