Germanııa stýdentteri EKSPO aıasynda Qazaqstanda bilim almaq
Ortalyq Azııa joǵary oqý oryndary arasynda osynaý qurmetti quqyqqa D.Serikbaev atyndaǵy Shyǵys Qazaqstan memlekettik tehnıkalyq ýnıversıteti ǵana ıe bolyp otyr. Bul talasqa Shyǵys Eýropa, TMD jáne Baltyq elderiniń joǵary oqý oryndary da túsken bolatyn. «DAAD jazǵy mektebin» ótkizý quqyǵyna Estonııa, Horvatııa, Ázerbaıjan, Slovenııa jáne Ýkraına joǵary oqý oryndary ıe boldy.
«Sabaq sheteldik stýdentter úshin úsh apta boıy ótedi jáne úsh kezeńnen turady», - deıdi Jer ǵylymy týraly fakýltettiń dekany Talant Ryspaev. - Birinshi apta - bizdiń ýnıversıtettegi «Bolashaq energııa: EKSPO-2017 kórmesi aıasyndaǵy Qazaqstannyń energotıimdi ındýstrııasynyń múmkindikteri» atty taqyrypta teorııalyq semınarlarǵa qatysý. Keıin olar Astanaǵa baryp, «EKSPO kezinde ekspozıtsııalarmen bir apta boıy tanysady. Úshinshi aptada stýdentter ShQO kásiporyndarynda, sonyń ishinde Buqtyrma GES-da tájirıbeden ótedi».
Germanııanyń DAAD akademııalyq almasýlar qyzmeti - stýdentter men ǵylymı qyzmetkerlerdi halyqaralyq almasýdy qoldaıtyn eń iri uıymdardyń biri. Mysaly, 2015 jyly DAAD Germanııanyń 239 joǵary oqý ornyn jáne 122 stýdenttik uıymyn biriktirdi. Shetelde, sonyń ishinde Qazaqstanda onyń 15 ókildigi, 55 aqparattyq ortalyǵy bar.
