Germanııa sırııalyqtarǵa kómek retinde 300 mıllıon eýro bólýdi ýáde etti
ASTANA. KAZINFORM — Germanııa BUU jáne basqa da birqatar uıym arqyly sırııalyqtarǵa kómek retinde taǵy 300 mıllıon eýro bólýdi ýáde etti. Bul týraly Germanııanyń syrtqy ister mınıstri Annalena Berbok dúısenbi kúni Brıýsselde EO basshylyǵymen ótetin donorlyq konferentsııa qarsańynda málimdedi, dep habarlaıdy Kazinform agenttiginiń tilshisi.
Reuters agenttiginiń málimetinshe, bólingen qarajattyń jartysynan astamy Sırııa halqyn qoldaýǵa baǵyttalady, alaıda olardy bólý eldiń ótpeli úkimetiniń qatysýynsyz júzege asyrylatynyn Berbok atap ótti.
Germanııa Syrtqy ister mınıstrliginiń málimdemesine sáıkes, bul qarajat azyq-túlikpen qamtamasyz etýge, medıtsınalyq qyzmetter kórsetýge, shuǵyl baspana usynýǵa, sondaı-aq halyqtyń eń osal toptaryn qorǵaý sharalaryna jumsalady.
Sondaı-aq, kómek Iordanııa, Lıvan, Irak jáne Túrkııada turatyn sırııalyq bosqyndar men olardy qabyldaýshy qaýymdastyqtarǵa kórsetiletinin Berbok qosa aıtty.
Ol taǵy da Sırııanyń beıbit bolashaǵyn qamtamasyz etý úshin ınklıýzıvti saıası úderistiń mańyzdylyǵyn atap ótti.
— Eýropalyqtar retinde biz Sırııa halqyn qorǵaýda birgemiz, erkin jáne beıbit Sırııa úshin kúresemiz, — dep málimdedi mınıstr.
Sondaı-aq, ol ótpeli úkimetti alavıt aýyldarynda júzdegen beıbit turǵynnyń óltirilýin tergeýge jáne kinálilerdi jaýapqa tartýǵa shaqyrdy.
Eske sala ketsek, 6-9 naýryz aralyǵynda Sırııanyń jaǵalaýyndaǵy Tartýs jáne Latakııa provıntsııalarynda bılikten taıdyrylǵan prezıdent Bashar Asadtyń jaqtastary men eldiń jańa bıligi arasynda qaqtyǵystar boldy. Oǵan Asad jaqtastarynyń Sırııanyń qoǵamdyq qaýipsizdik kúshterine shabýyl jasaýy sebep bolǵan. Monıtorıngtik toptardyń biriniń málimetinshe, zorlyq-zombylyq tolqyny saldarynan 1000-nan astam adam qaza tapqan.
Bul shabýyl bılikten taıdyrylǵan prezıdent Bashar Asad tıesili bolǵan alavıt qaýymdastyǵynyń ókilderin óltirýge ákeldi. Alavıtter — dástúrli túrde Sırııanyń jaǵalaý aımaqtarynda qonystanǵan jáne eldiń bıleýshi elıtasynda mańyzdy oryn alǵan dinı azshylyq toby.
Ótken aptada Sırııa basshysy bes jylǵa arnalǵan ýaqytsha konstıtýtsııaǵa qol qoıdy. Ol ótpeli kezeńde barlyq sırııalyqtardyń quqyqtaryn qorǵaýǵa ýáde beredi.