Germanııa prezıdenti: Qazaqstannyń saıası reformalary qýantady

ASTANA. QazAqparat - Qazaqstanǵa resmı saparmen kelgen Germanııa prezıdenti Frank-Valter Shtaınmaıer aldymen saıası qorlardyń ókilderimen, sondaı-aq nemis dıasporasymen kezdesip, saıası-áleýmettik axýaldy bilip qaıtty, dep xabarlaıdy QazAqparat tilshisi.

"Búgin tań ata biz nemis tildi dıasporamen kezdesip qaıttyq. Jańa shirkeýdiń salynyp jatqanyna rızamyz. Bolashaqta ol jerde protestant, evangelıe men lıýterannyń ókilderi jınalady. Osy saladaǵy ózara túsinistik pen dıalogtyń baryna qýanyshtymyz", - dedi ol.

Budan bólek, Shtaınmaıer myrza kúni keshe Qazaqstandaǵy nemistiń saıası qorlarynyń ókilderimen de kezdeskenin jetkizdi. Onyń aıtýynsha, saıası uıymdar deńgeıindegi dıalog jaqsy damyp keledi. "Germanııanyń saıası qorlary bul jerde jaqsy jumys istep jatyr eken. Olar úshin barlyq jaǵdaılar jasalady. Quqyqtyq memleketti qurý boıynsha bizdiń tarapymyzdan beriletin aqyl-keńesterge de qulaq asady. Osy saladaǵy ózgerister de joq emes. Qazaqstannyń Eýropaǵa qaraı bet buryp, zań ústemdigin ornatý salasyndaǵy jumysy tabysty bolsyn!", - dep atap kórsetti Shtaınmaıer.

Osy oraıda Germanııa basshysy Qazaqstandaǵy konstıtýtsııalyq ózgeristerge, atap aıtqanda Prezıdent ókilettilikterin Úkimet pen Parlamentke berý sharalaryna joǵary baǵa berdi.