Germanııa prezıdenti ekinshi merzimge qaıta saılandy

BERLIN. QazAqparat - Germanııa Federatıvti Respýblıkasynyń prezıdenti bolyp Frank-Valter Shtaınmaıer qaıta saılandy, dep habarlaıdy QazAqparat Deutsche Welle basylymyna silteme jasap.

Jeksenbide Federaldy jınalys músheleriniń basym bóligi onyń kandıdatýrasyn qoldap daýys bergen.

Berilgen jáne jaramdy dep tanylǵan 1425 daýystyń ishinde 1045 adam qazirgi prezıdentti qoldaǵan.

Jınalystyń 86 múshesi daýys berýden qalys qalǵan, 294 adam basqa úmitkerlerdi durys kórgen.

66 jastaǵy Shtaınmaıer saılaýdyń birinshi týrynda-aq jeńiske jetti. Ony eldegi búkil bedeldi, saıası salmaǵy bar iri partııalar qoldady.

Federaldy jınalys tek qana prezıdentti saılaý úshin bes jylda bir márte jınalady. Onyń jartysy - býndestag depýtattary bolsa, qalǵan jarymy 16 landtag - jer parlamentinen joldanǵan saılaýshylardan turady. Olar jergilikti depýtattar, saıasatkerler, qoǵam qaıratkerleri, sondaı-aq sportshy, mýzykant sekildi tanymal adamdar da bolýy múmkin.

Bıyl Federaldy jınalystyń jumysyna 1472 adam qatysty.

Frank-Valter Shtaınmaıerden bólek bul saılaýda taǵy úsh kandıdat baq synady: maındtyq dáriger Gerhard Trabert (Gerhard Trabert), ol 96 daýys jınady, ekonomıst Maks Otte (Max Otte), onyń enshisinde 140 daýys bar jáne astrofızık Shtefanı Gebaýer (Stefanie Gebauer) - 58 daýys.

Jumysshy otbasynan shyqqan, saıasatta júrgenine 25 jyldan asqan Frank-Valter Shtaınmaıer 1956 jyly 5 qańtarda týǵan.

2017 jyly naýryzda FRG prezıdenti bolyp saılanǵan. Bul - onyń el basqaratyn ekinshi merzimi.