Germanııa prezıdenti Sholts pen onyń úkimetin otstavkaǵa jiberdi

ASTANA. KAZINFORM — Jańa Býndestagtyń birinshi otyrysy ótken kúni Frank-Valter Shtaınmaıer kantsler men úkimetti otstavkaǵa jiberdi. Olar otstavkaǵa ketý týraly kýálik aldy, biraq ýaqytsha mindetti atqarýshy qyzmetinde qalady, dep habarlaıdy dw.com.

Germanııa prezıdenti Frank-Valter Shtaınmaıer federaldyq kantsler Olaf Sholts pen onyń úkimetiniń 14 mınıstrine otstavkaǵa ketý týraly kýálikterin tabys etti. Saltanatty rásim Berlın ortalyǵyndaǵy Belvıý prezıdenttik saraıynda ótti. 

GFR Negizgi zańynyń 69-babyna sáıkes kantsler men mınıstrler jańa Býndestag shaqyrylǵan kúni jumysyn toqtatady. Onyń birinshi otyrysy 25 naýryzda ótti. 

Alaıda Shtaınmaıer Sholts pen barlyq 14 mınıstrden ýaqytsha qyzmette taǵy birneshe apta qyzmetinde qalýyn surady. Bul protsedýra zańmen de qarastyrylǵan.
Kantsler men mınıstrler jańa úkimet jumysyn jańa úkimet qurylǵansha jalǵastyrady. Frıdrıh Merts (Friedrich Merz) buǵan deıin ony Pashaǵa qaraı (20 sáýir) qurýǵa ýáde etken bolatyn.

Shtaınmaıer mınıstrler aldynda sóılegen kezde olarǵa «alǵys pen rızashylyǵyn» bildirdi, Sholtsty «aqyldyń daýysy» dep atady jáne kantsler men úkimettiń, sonyń ishinde Ýkraınadaǵy soǵystyń saldaryn eńserýdegi «orasan kúsh-jigerin» joǵary baǵalady. Sholts pen Shtaınmaıer buryn Germanııanyń sotsıal-demokratııalyq partııasynda (GSDP) partııalas bolǵan. Sońǵysy 2017 jyly prezıdent bolǵan soń músheligin toqtatty.

Aıta ketelik Germanııa Parlamenti qorǵanys shyǵyndaryn ulǵaıtý týraly tarıhı sheshim qabyldaǵan edi.