Germanııa Polsha men Chehııa shekarasyndaǵy baqylaýdy kúsheıtti
Germanııanyń Іshki ister mınıstrligi shekaradaǵy baqylaýdyń maqsaty «kontrabandısterge barynsha qysym kórsetý» jáne adamdardy qorǵaý ekenin málim etti, dep habarlaıdy QazAqparat tilshisi.
Nemis basylymy sársenbi kúni Germanııa Polsha men Chehııa shekarasynda «kontrabanda marshrýttaryn» polıtseılerdiń torýyldaýy kúsheıetinin jazdy. Bul qadam Germanııanyń elge zańsyz mıgranttar kirip ketpes úshin jasalyp otyr. Jaqynda mıgranttar aǵynynyń artýy Germanııa ishinde saıası debat týdyryp, kantsler Olaf Sholts basqaratyn el úkimetine qysym boldy.
GFR Іshki ister mınıstrligi Nensı Feızer operatsııaǵa qansha polıtsııa qyzmetkeri tartylatynyn naqtylaǵan joq. Biraq baqylaý sharalary osy aptada kúshine enetinin eskertti. «Meniń maqsatym – kontrabandashylarǵa qysymdy kúsheıtip, adamdardy qorǵaý», - dedi ol.
Degenmen N.Feızer bul qadam shekara baqylaýy únemi júrgizilip turatynyn bildirmeıdi dedi. Germanııa mundaı sharalardy 2015 jyly Aýstrııamen shekara baqylaýy kúsheıgen kezde qoldanǵan bolatyn.
Іshki ister mınıstri qabyldanǵan jańa sharalar tıimdi bolmasa, bolashaqta qatań baqylaý engizilýi múmkin ekenin málimdedi.
Germanııa mýnıtsıpalıtetteri federaldyq úkimetti mıgranttarǵa shamasy jetý úshin kóbirek qarjy bólýge shaqyrdy. Sebebi olardy jatyn oryn men qyzmettermen qamtamasyz etý júktemesi artqan.
Oqıǵa 2015 jylǵy jaǵdaıǵa uqsaıdy. Sol kezde Germanııa Taıaý Shyǵystaǵy soǵystan qashqan 1 mln astam qashqyndy qabyldaǵan bolatyn, dep atap ótti nemistik BAQ.
Germanııanyń oppozıtsııalyq partııalary da pana suraýshylardyń sanyn qysqartýǵa shaqyrdy, al Bavarııa premer-mınıstri Markýs Zeder pana suraýshylardyń jyldyq shekti normasyn 200 adam dep bekitýdi usyndy. Sondaı-aq Berlınniń mıgratsııany baqylaý men mıgranttar aǵynyna qatysty qaıshylyqtary bar.
Eki apta buryn Germanııa kelgen mıgranttar týraly Italııamen kelisimdi toqtatpaq bolyp, Rımdi erejeni saqtamady dep aıyptady. Ereje boıynsha pana usyný týraly ótinish alǵash kelgen EO elinde qaralýy kerek. Al Italııa premer-mınıstri Djordjııa Melonı Germanııa úkimetin «Italııa aýmaǵynda zańsyz mıgranttardy qabyldaýmen jáne Jerorta teńizinde qutqarýmen aınalysatyn úkimettik emes uıymdarǵa» qarjylyq qoldaý kórsetti dep synǵa aldy.
Eki el de EO deńgeıinde máseleniń sheshimi tabylady degen úmitte. Al munda Eýroodaqtyń mıgratsııa men pana usyný salasyndaǵy saıasatty retteý amaly Eýroodaqtyń 27 eli arasyndaǵy kelispeýshilik saldarynan toqtap qaldy.
