Germanııa polıtsııasy memlekettik tóńkeriske daıyndyq jasaǵan 25 kúdiktini ustady
BERLIN. QazAqparat – Germanııa polıtsııasy bılikti kúshpen qulatýǵa daıyndyq júrgizgen «ishki terrorıstik uıymnyń» 25 kúdikti múshesi men jaqtastaryn tutqyndady.
Ádilet mınıstri Marko Býshman bul uıym GFR zańdylyǵyn moıyndamaıtyn «Reichsbürger» ıdeologııasynyń bóligi ekenin aıtty, dep habarlaıdy QazAqparat Deutsche Welle-ge silteme jasap.
Sársenbi kúni tańerteń júrgizilgen tintý jumystary barysynda osy lańkestik uıymnyń músheleri men jaqtastary dep tanylǵan 25 kúdikti ustaldy.
Býshman tergeýdiń kúdikti «Reichsbürger» qozǵalysymen baılanysy bar lańkestik uıymǵa qarsy baǵyttalǵanyn aıtty.
Onyń aıtýynsha, tintý Germanııanyń memlekettik mekemelerine qarýly shabýyl jasaýdy josparlady degen kúdikke ilingen adamdarǵa qatysty júrgizilgen.
«Búgin tańerteńnen beri lańkestikke qarsy iri operatsııa júrip jatyr. Federaldy Bas prokýror kúdikti lańkestik uıymdy tergep jatyr. Konstıtýtsııalyq organdarǵa qarýly shabýyl jasaý josparlanǵan degen kúdik bar», - dep jazdy Býshman.
Іzdeý operatsııasy Germanııanyń on bir federaldy aımaǵyndaǵy 52 kúdiktige tıesili 130 múlikti qamtydy, dep habarlandy.
Prokýratýra ókilderiniń aıtýynsha, qamaýǵa alynǵan kúdiktiler «2021 jyldyń qarasha aıynyń sońyna qaraı qurylǵan terrorıstik uıymǵa jatady. Ol Germanııanyń qoldanystaǵy memlekettik tártibin qulatýdy jáne ony ózderi qurǵan memlekettik formasymen almastyrýdy maqsat etken».
«Reichsbürger» qozǵalysy Brandenbýrg, Meklenbýrg-Pomeranııa jáne Bavarııa elderindegi birqatar shaǵyn uıymdar men jeke tulǵalardan turady. Olar Germanııa Federatıvtik Respýblıkasynyń da, onyń kez-kelgen memlekettik organdarynyń da zańdylyǵyn moıyndamaıdy.
Foto: Paul Zinken/dpa
