Germanııa Polshaǵa qarsy sanktsııa engizýge shaqyrdy
ASTANA. QazAqparat - Nemis býndestagindegi Hrıstıandyq-demokratııalyq odaq/Hrıstandyq-áleýmettik odaq (HDO/HÁO) blogynyń ókilderi BAQ jáne Konstıtýtsııalyq sot týraly jańa polıak zańdaryna baılanysty Polshaǵa qarsy sanktsııa engizýdi usyndy, dep habarlady RIA Novostı.
Býndestagtaǵy HDO/HÁO fraktsııasynyń basshysy Folker Kaýder Der Spiegel basylymyna bergen suhbatynda EO elderi «eýropalyq qundylyqtar buzylatyn bolsa, sanktsııa engizýden taıynbaý qajet», dep málimdedi. «Polıak úkimeti Eýropada keıbir irgeli qundylyqtardy buzýǵa bolmaıtynyn bilýi tıis», - dedi ol.
Eýroparlamenttegi HDO/HÁO blogynyń tóraǵasy Herbert Reýl de Polshaǵa qarsy aıyppul sharalaryn engizýdi qoldady. «Eger saıası dıalog nátıje bermese, ekonomıkalyq sanktsııalar qajet», - dep málimdedi saıasatker Der Spiegel jýrnalyna.
Budan buryn 7 qańtarda Polsha prezıdenti Andjeı Dýda BAQ týraly zańǵa túzetýler engizgen bolatyn, onda TVP men Polsha radıosynyń qazirgi basqarma músheleri men baıqaýshy keńesteri músheleriniń ókilettik merzimin aıaqtaý kózdelgen. Polsha qarjy mınıstri «jańa memlekettik BAQ uıymy engizilgenge deıin» basshylyqtyń jańa quramyn taǵaıyndaý quqyǵyna ıe boldy. Sonymen birge, Polsha qarjy mınıstrliginiń basshysy kózdelgen túzetýge saı bolýy úshin memlekettik BAQ jarǵylaryn ózgerte alady.
2015 jylǵy jeltoqsannyń aıaǵynda Dýda Konstıtýtsııalyq sot týraly zańǵa ózgeristerdi bekitti, oǵan sáıkes endi budan bylaı Konstıtýtsııalyq sot sýdıalardyń ókilettigin toqtata almaıdy jáne parlamenttiń tómengi palatasyna (seım) «erekshe jaǵdaılarda ǵana» tıisti saýal ázirleı alady. Sýdıalarǵa qatysty tártiptik jaza prezıdenttiń nemese ádilet mınıstriniń saýalymen ǵana qoldanylady. Sonymen birge, sottyń quramy 9 adamnan 15 adamǵa deıin keńeıtiledi, sheshimderdi bekitý úshin burynǵy qarapaıym kópshiliktiń emes, quramnyń úshten eki bóliginiń kelisimi qajet.
Eki zań da Polshanyń ózinde úlken daý týdyryp, Brıýsseldiń synyna ushyrady., bul zańdar quqyqtyq memlekettiń prıntsıpterin buzady dep sanaıdy Eýroodaq.
Eýrokomıssııa Varshavaǵa túsindirme talap etip jáne osy máselemen 13 qańtarda pikirsaıys ótkizý nıeti týraly eki hat joldady.
