Germanııa pana suraýshylar úshin shekarasyn jabady

ASTANA. KAZINFORM — Beısenbiden bastap Germanııa pana suraýshylardy elge kirgizbeıdi jáne shekaradaǵy baqylaýdy kúsheıtedi, dep jazady Euronews.

Bul týraly eldiń ishki ister mınıstriniń jańa basshysy Aleksandr Dobrındt málimdedi.

Kantsler laýazymyna kirisken alǵashqy kúninde Frıdrıh Merts «zańsyz kirý áreketteriniń barlyǵyna tosqaýyl qoıylatynyn, jaramdy tólqujaty joq barlyq adam úshin kirýge tyıym salynady» dep málimdedi. Bul Eýropalyq Odaqtyń qaýipsiz elderi arqyly ótetin pana suraýshylarǵa da qatysty.

Aqpan aıynda Ashaffenbýrde elden shyǵarylýy tıis 28 jastaǵy Aýǵanstan azamaty saıabaqta balabaqsha búldirshinderine pyshaqpen shabýyl jasaǵan. Qaıǵyly oqıǵa saldarynan marokkolyq bala men nemis azamaty qaza tapty, taǵy úsh adam aýyr jaraqat aldy.

Endi jańa ishki ister mınıstri Aleksandr Dobrındt (HSS) Mertske bergen ýádesin oryndaýǵa kiristi.

Sársenbide Dobrındt federaldy polıtsııaǵa shekaralyq baqylaýdy kúsheıtý jáne zańsyz kirý jaǵdaıynda qujattardy qabyldaýdan bas tartý týraly buıryq berdi. Bul EO elderi men Shveıtsarııa arqyly alǵash ret elge kiretin adamdarǵa qatysty.

Aıta ketý kerek, 2015 jyly Merkel kezinde shyǵarylǵan qaýlyda federaldy polıtsııa qyzmetkerlerine qujattary zańsyz mıgranttardy, eger olar pana surasa, nemis shekarasynan ótýge ruqsat berýdi mindettegen («Qujattary joq jáne pana suraıtyn úshinshi elderdiń azamattaryna kirýge ruqsat etiledi»). Bul qujattyń saldarynan toǵyz jyl boıy júzdegen myń adam Germanııaǵa baqylaýsyz kirdi, biraq olardyń kópshiliginiń pana alýǵa quqyǵy bolmady. Baqylaýsyz jáne zańsyz mıgratsııa Germanııada qylmys pen zorlyq-zombylyqtyń artýy tárizdi qaýipsizdik máselelerin týyndatty.

Buǵan deıin Qasym-Jomart Toqaev Frıdrıh Mertsti Germanııanyń Federaldyq Kantsleri bolyp saılanýymen quttyqtaǵany habarlandy.

Eýroodaq kóshbasshylary Mertsti jańa laýazymymen quttyqtaǵanyn jazǵanbyz.