Germanııa óz áskeriniń sanyn 60 myń adamǵa deıin arttyrady

ASTANA. KAZINFORM — NATO-nyń qarýlaný men jeke quramǵa qoıylǵan jańa maqsattaryna sáıkes, Germanııaǵa qosymsha 60 myńǵa jýyq áskerı qyzmetshi qajet bolady, dep jazady AZERTADJ.

Bul týraly Germanııanyń qorǵanys mınıstri Borıs Pıstorıýs málimdedi. Onyń aıtýynsha, bul sheshim alıanstyń kúshterin ulǵaıtý aıasynda qabyldanyp otyr.

— Biz Eýropadaǵy eń iri ekonomıka retinde jaýapkershilikti óz moınymyzǵa alamyz, — dedi mınıstr Brıýsselde NATO áriptesterimen kezdesý aldynda jýrnalısterge.

NATO qorǵanys josparlaryn jasaǵanda, birqatar olqylyqty anyqtaǵan: soǵysqa qabiletti iri qurlyq kúshteriniń jetispeýi, alys qashyqtyqqa arnalǵan qarýdyń, oq-dári qory men senimdi baılanys quraldarynyń tapshylyǵy baıqalǵan, dep habarlaıdy Reuters agenttigi.

— Biz áýe shabýylynan qorǵanys júıelerine, alys qashyqtyqtaǵy zymyrandarǵa, manevrlik qurlyq kúshterine, basqarý jáne baqylaý júıelerine ınvestıtsııa salýymyz kerek. Munyń bári úlken qarjy salymdaryn talap etedi, — dedi Pıstorıýs.

Mınıstrdiń aıtýynsha, jalpy Germanııa Qarýly Kúshterine (Býndesverge) barlyq áskerı salalar boıynsha qosymsha 50–60 myń áskerı qyzmetker qajet bolady. Bul áskerdiń jalpy sany 250–260 myń adamǵa jetetinin bildiredi.

NATO Germanııadan qosymsha jeti armııalyq brıgada, ıaǵnı shamamen 40 myń sarbaz bólýin suraǵan. Alaıda ondaǵan myń adamdy áskerge tartý Berlın úshin úlken syn bolmaq jáne 2011 jyly joıylǵan mindetti áskerı qyzmetti qaıta engizý týraly pikirtalastardy kúsheıtýi múmkin.

Germanııa Qorǵanys mınıstrliginiń málimetinshe, Býndesver áli 2018 jyly belgilengen 203 myń adamdyq mejege jete almaǵan. Qazirgi ýaqytta 20 myńǵa jýyq turaqty áskerı oryn bos tur.

Pıstorıýstyń aıtýynsha, úkimet aldaǵy ýaqytta erikti áskerı qyzmet júıesi jetkilikti bola ma degen máseleni sheshýi kerek. Degenmen, ol qazirgi tańda áskerı jataqhanalar men ınstrýktorlar jetispeıtinin, sondyqtan kóp mólsherde sarbaz qabyldaý qıyn ekenin atap ótti.

Jaqynda Germanııa qorǵanys shyǵyndaryn arttyrý maqsatynda «qaryz tejegishin» jeńildetip, NATO bas hatshysy Mark Rıýtteniń alıanstyń maqsatty shyǵyndaryn jyldyó ishki ónimniń 5 paıyzyna deıin jetkizý josparyn qoldady.

Buǵan deıin habarlanǵandaı, Germanııada bosqyndar sany 3,5 mln adamǵa jetti.