Germanııa oqýshylary áskerı qyzmet týraly zań jobasyna qarsy shyǵyp jatyr
ASTANA. KAZINFORM — Germanııada stýdentter men oqýshylar Býndestag qabyldaǵan áskerı qyzmetti retteıtin zań jobasyna qarsy narazylyqqa shyqty, dep habarlaıdy Anadolý
Myńdaǵan oqýshy «Mindetti áskerı qyzmetke qarsy oqýshylar ereýili» bastamasynyń úndeýimen ótken aktsııalarǵa qatysty. Bul bastama el boıynsha túrli jastar jáne stýdenttik uıymdardy biriktiredi.
Berlınde úsh myńnan astam oqýshy Hallesches Tor metro stantsııasyna jınalyp, Oranıenplats alańyna deıin júrip ótti. Aktsııaǵa kóptegen ata-ana da qoldaý kórsetti.
Narazylar «Soǵys emes — kásibı bilim», «Maıdanǵa ózderińiz baryńyzdar», «Soǵysqa kim barǵysy keledi?» jáne «Áskerge barý — meniń josparymda joq» degen jazýlary bar plakattar ustap júrdi.
Aktsııalar shamamen 90 qalada ótti: Potsdam, Kotbýs, Gambýrg, Keln, Essen, Dıýsseldorf, Gannover, Shtýtgart, Ýlm, Tıýbıngen, Geıdelberg jáne basqalar.
Búgin tańerteń Býndestag Germanııa Qarýly kúshteriniń sanyn arttyrýdy maqsat etetin áskerı qyzmetti retteý týraly zań jobasyn qabyldady.
Qujatqa sáıkes, 18 jasqa tolǵan barlyq azamattarǵa Býndesverde qyzmet etýge yntasy men jaramdylyǵyn anyqtaıtyn anketa jiberiledi. Er adamdar úshin anketany toltyrý mindetti. Sonymen qatar 2008 jylǵy 1 qańtardan keıin týǵan er azamattar úshin mindetti áskerı-medıtsınalyq tekseris engiziledi.
Alǵashqy kezeńde áskerı qyzmetke shaqyrý erikti túrde júrgiziledi. Biraq qajettá ásker sany tolmasa, mindetti áskerı qyzmet engizilýi múmkin. Bul jóninde sheshimdi Býndestag qabyldaıdy.
Germanııa Reseı tarapynan tónetin qaýip pen NATO josparlaryndaǵy ózgerister aıasynda 2035 jylǵa qaraı qarýly kúshter sanyn 460 myń adamǵa jetkizýdi kózdep otyr.
Zań jobasyn Býndesrat maquldap, onyń 2026 jylǵy 1 qańtardan bastap kúshine enýi kútilip otyr.
Eske sala ketsek, keshe Germanııa jańa áskerı qyzmet týraly zańdy maquldady.