Germanııa musylman elderinde dıplomatııalyq elshilikterdi jabýda
ASTANA. 14 qyrkúıek. QazAqparat - Germanııanyń syrtqy ister mınıstrligi Aýǵanstanda, Pákistan men birqatar soltústikafrıkandyq elderde dıplomatııalyq elshilikterdi ýaqytsha jabýǵa sheshim qabyldady.
Bul týraly vedomstvo ókilderine silteme jasaı otyryp Spiegel habarlady. Mundaı sheshim AQSh-daǵy Egıpet, Týnıs, Lıvııa jáne Iemen elshilikteri men konsýl ǵımarattaryna jasalǵan shabýyldardan keıin qabyldandy.
Vedomstvo basshysy Gıdo Vestervelle sońǵy qaıǵyly oqıǵalarǵa baılanysty alańdaýshylyq bildirdi, jergilikti bılikti arab elderinde nemis dıplomattarynyń qaýipsizdigin qamtamasyz etýge shaqyrdy. Mınıstr atap ótkendeı, «Musylmandardyń páktigi» atty atyshýly fılmniń shyǵýy dinı adamdardyń sezimin qorlaý, zorlyq-zombylyq kórsetýdiń amaly emes.
Nemistiń bılik ókilderi dástúrli juma namazynan keıin narazylyq aktsııasy bolady dep sekem alyp, juma kúni elshilikti jabýǵa uıǵardy. Aýǵanstandaǵy qarýly kúshterdiń jasaǵy qyzmetterin kúsheıtti. Keıbir elderde Berlın elshilikterdi uzaq ýaqytqa jabýy múmkin degen boljam bar.
Buǵan deıin Memlekettik departament AQSh-taǵy Armenııa men Býrýndı, Kýveıt pen Sýdan, Týnıs pen Zambııa jáne Egıpettiń elshilikterin yqtımal antıamerıkandyq narazylyq aktsııalary jóninde eskertken bolatyn. Degenmen ashýǵa býlyqqan musylmandar AQSh-tyń Iemendegi, Egıpet pen Lıvııadaǵy elshilikterine shabýyl jasady. BUU men AQSh-tyń prezıdenti Barak Obama resmı túrde Bengazıde amerıkandyq dıplomattarǵa kórsetilgen qoqan-loqqy áreketterin aıyptady.
