Germanııa mıgranttarǵa arnalǵan nemis tili emtıhanynyń talaptaryn qatańdatady
ASTANA. KAZINFORM – Germanııa Іshki ister mınıstri Aleksander Dobrındt ıntegratsııalyq kýrstar aıaqtalǵannan keıin tapsyrylatyn nemis tilinen emtıhannyń (Deutsch-Test für Zuwanderer – DTZ) talaptaryn qatańdatpaq. Bul týraly DW basylymy jazdy.
Jańa tártip 2026 jylǵy 1 qarashadan bastap kúshine enýge tıis. Vedomstvo bul ózgeristi til emtıhanyn tapsyrý kezinde alaıaqtyq áreketterdiń jıileýimen baılanystyrady.
Emtıhandaǵy bir tapsyrma únemi oryndalmaıdy
Germanııanyń Іshki ister mınıstrligi ıntegratsııalyq kýrstarǵa qatysýshylardyń keıbiri ınternetten emtıhan tapsyrmalary men olardyń durys jaýaptaryn zańsyz satyp alǵan bolýy múmkin dep kúdiktenedi. Áńgime, atap aıtqanda, jazbasha emtıhan bólimderiniń biri týraly bolyp otyr. Bul bólimde úmitkerler qysqa habarlamalardy tyńdap, oqyp, sodan keıin usynylǵan jaýaptardyń ishinen durysyn tańdap, suraqtarǵa jaýap berýi kerek.
Sonymen qatar emtıhan kezinde shaǵyn kólemdegi jartylaı resmı hat jazý qajet. Mysaly, qandaı da bir memlekettik mekemege ótinish joldaý, úı ıesine shaǵym jazý nemese mektepke túsinikteme berý talap etiledi. Alaıda Іshki ister mınıstrliginiń nazar aýdarýynsha, qatysýshylar osy tapsyrmany jıi oryndamaıdy, ıaǵnı múldem ótkizip jiberedi.
Soǵan qaramastan, úmitkerler test suraqtaryna qatesiz derlik jaýap berýi múmkin. Mundaı jaǵdaıda, eger olar aldyńǵy tapsyrmalardy jaqsy oryndap, aýyzsha sóıleý boıynsha V1 deńgeıine qajetti bilimin kórsetse, emtıhan tapsyryldy dep eseptelip kelgen.
Alaıda Bild basylymynyń jazýynsha, qarasha aıynan bastap emtıhannyń kez kelgen bólimi tıisti deńgeıde oryndalmasa, DTZ synaǵy tapsyryldy dep sanalmaıdy.
Jańa talaptyń maqsaty – alaıaqtyq shemalardyń jolyn kesý. Emtıhan tapsyrmalary ár joly jańadan qurastyrylǵanymen, mundaı zańsyz áreketter tirkelgen. Buǵan deıin Germanııanyń WDR medıa kompanııasy test suraqtarynyń durys jaýaptary ınternette satylǵan jaǵdaılar týraly habarlaǵan.
Atap aıtqanda, bir oqıǵada Telegram tobynan emtıhan tapsyrmalary men olardyń jaýaptary 250 eýroǵa satyp alynǵany aıtylǵan. Germanııanyń Іshki ister mınıstrligi bul ózgeristi qajetti shara dep sanaıdy. Óıtkeni nemis tilinde mátin qurastyryp, hat almasý qabileti qoǵamǵa sátti kirigýge jáne kúndelikti máselelerdi óz betinshe sheshýge múmkindik beretin mańyzdy sharttardyń biri.
Memlekettik shyǵyndardy qysqartý jáne baqylaýdy kúsheıtý
Buǵan deıin Germanııa úkimeti ıntegratsııalyq kýrstarǵa jumsalatyn shyǵyndardy qysqartý týraly sheshim qabyldaǵan. Berliner Zeitung basylymynyń málimetinshe, endi bul maqsatqa jyl saıyn shamamen 600 mln eýro bólinedi. Buǵan deıin qarjylandyrý kólemi 1,3 mlrd eýrony quraǵan.
Sonymen qatar memleket qarjylandyratyn ıntegratsııalyq kýrstarǵa baspana suraýshylar (Asylbewerber) men basqa da keıbir toptardyń qatysýyna endi ruqsat berilmeıdi. Olarǵa aýqymdy ıntegratsııalyq kýrstardyń ornyna bastapqy tanystyrý kýrstary usynylady. Bul kýrstarda til úıretilip, eldiń qoǵamdyq-saıası qurylymy qarapaıym deńgeıde túsindiriledi.
Sonymen birge ıntegratsııalyq kýrstar mıgranttardyń jańa ortaǵa beıimdelýiniń mańyzdy tetigi sanalady. Qazirgi formatta olar nemis tilin úırenýge arnalǵan 600 oqý saǵatyn jáne sheteldikterdi Germanııanyń tarıhymen, mádenıetimen, saıasatymen ári zańdarymen tanystyratyn 100 saǵattyq baǵdarlaý kýrsyn (Orientierungskurs) qamtıdy.
Integratsııalyq kýrstardaǵy til emtıhany qalaı ótedi?
DTZ emtıhany nemis tilin meńgerý deńgeıin úsh baǵyt boıynsha baǵalaıdy: tyńdalym men oqylym, jazylym jáne aýyzsha qarym-qatynas. Ol Eýropa Keńesi ázirlegen shet tilin meńgerý deńgeıin baǵalaýdyń halyqaralyq júıesi – Tilderdi meńgerýdiń jalpy eýropalyq quzyretter júıesine (Common European Framework of Reference for Languages) sáıkes A2 nemese V1 deńgeıin rastaıdy.
Bul emtıhan ıntegratsııalyq kýrsty aıaqtaǵany týraly sertıfıkat alý úshin mindetti. Onyń nátıjesi Germanııada turýǵa yqtııarhat pen azamattyq alýǵa da áser etedi.
2025 jyly Germanııada DTZ emtıhanyn shamamen 318 550 adam tapsyrǵan. Olardyń 55%-y V1 deńgeıin, al 32%-y A2 deńgeıin rastaǵan.
Til emtıhanyna engizilgen ózgeris memleket usynatyn ıntegratsııalyq kýrstardyń sapasyn arttyrýǵa baǵyttalǵan jalǵyz shara emes. Germanııanyń Kóshi-qon jáne bosqyndar jónindegi federaldyq vedomstvosy (BAMF), sonyń ishinde, aýyzsha jáne jazbasha emtıhandardyń bir kúnde ótkizilýin buǵan deıin de talap etip kelgen.
Eske sala ketsek, buǵan deıin Germanııa balalardyń zeınetaqy shotyna aı saıyn 10 eýrodan aýdaratynyn habarladyq.
