Germanııa men Ortalyq Azııa arasyndaǵy saýda aınalymynyń 80% astamy Qazaqstanǵa tıesili

ASTANA. QazAqparat – Germanııa men Ortalyq Azııa arasyndaǵy saýda aınalymynyń 80 paıyzdan astamy Qazaqstanǵa tıesili. Premer-Mınıstrdiń birinshi orynbasary Roman Sklıar qazaq-nemis bıznes forýmynda osyndaı málimet keltirdi, dep habarlaıdy QazAqparat tilshisi.

«Germanııa Qazaqstan úshin Eýroodaqtaǵy negizgi ekonomıkalyq áriptes sanalady. Eki el arasynda dıplomatııalyq qatynastar ornaǵan sátten bastap turaqty, senimdi jáne syndarly dıalog qalyptasty. Eleýli shart-quqyqtyq baza quryldy. Biz saýda-ekonomıkalyq yntymaqtastyq jónindegi úkimetaralyq jumys toby, Berlın Eýrazııalyq klýby, ınvestıtsııa salasyndaǵy yntymaqtastyqty nyǵaıtý jónindegi arnaıy úkimettik jumys toby sııaqty dıalog alańdary sheńberinde ózara tyǵyz is-qımyl ornatyp otyrmyz», - dedi Roman Sklıar.

Onyń aıtýynsha, Germanııanyń Ortalyq Azııamen aradaǵy saýda aınalymynda Qazaqstannyń úlesi 80 paıyzdan asqan.

«Qazaqstan Germanııanyń Ortalyq Azııadaǵy jetekshi ekonomıkalyq seriktesi bolyp otyr. Bul el bizdiń óńirmen jasap otyrǵan saýdanyń 80%-dan astamy Qazaqstanǵa tıesili. Búkil kedergilerge qaramastan, eki el arasyndaǵy ózara saýda ótken jyly artyp, bıyl taýar aınalymynyń aıtarlyqtaı ósýine qolaıly jaǵdaı týyndap otyr. Ótken jyldyń qorytyndysy boıynsha taýar aınalymy 2,8 mlrd dollar bolǵan. Bul 2021 jyldyń kórsetkishinen 5% joǵary. Mundaı dınamıka birlesken jobalardy iske asyrýdaǵy oń úrdisterdiń arqasynda múmkin boldy. Búgingi tańda Qazaqstanda german kapıtalynyń qatysýymen 1 myńnan astam kompanııa bar. Biz jańa ınvestıtsııalyq jobalardy iske qosý úshin nemis bıznesimen ári qaraı belsendi jumys isteýge múddelimiz», - dedi birinshi vıtse-premer.