Germanııa men Qazaqstannyń energetıkalyq yqpaldastyǵy jaqsy ilgerilep keledi – Olaf Sholts
ASTANA. KAZINFORM – Germanııa men Qazaqstannyń energetıkalyq yqpaldastyǵy jaqsy ilgerilep keledi. Bul týraly Aqordada Memleket basshysy Qasym-Jomart Toqaevpen keńeıtilgen quramdaǵy kelissóz barysynda Germanııanyń Federaldyq kantsleri Olaf Sholts aıtty.
«Ótken jyly qarym-qatynasymyz jaqsy damydy, úlken ekonomıkalyq baılanystardyń da bolatynyn kórip otyrmyz. Menimen birge úlken delegatsııa, bıznes ókilderi keldi. Bizdiń maqsatymyz – ekonomıkalyq baılanystarymyz úshin jaqsy jaǵdaı jasaý, elderińizge tikeleı ınvestıtsııa salý, saýda alys-berisin jandandyrý. Energetıkalyq turǵyda yntymaqtastyqty jaqsy ilgeriletýdemiz. Munaı kelip jatyr. Mundaı senimdi, naqty, anyq, dáıekti yntymaqtastyqqa óte qýanyshtymyz», - dedi Germanııa basshysy.
Sonymen qatar ol shaǵyn quramdaǵy kelissóz barysynda Qazaqstan Prezıdentimen halyqaralyq qaýip-qaterlerge baılanysty da pikir almasqanyn atap ótti. Reseı men Ýkraına arasyndaǵy qaqtyǵystyń da nazardan tym qalmaǵanyn aıtty.
«Biz úshin álemde beıbit saýda-sattyqtyń bolǵany, protektsıonıstik umtylystyń tabysqa jete almaǵany asa mańyzdy. Osy oraıda búgingi kezdesýge jáne Ortalyq Azııannyń barlyq memleketiniń Prezıdentterimen erteńgi kezdesýge óte qýanyshtymyn. Osy kezdesýge óte jaqsy daıyndalǵanyńyz úshin rızashylymdy bildiremin jáne ol mindetti túrde tabysqa jeteleıdi», - dedi Olaf Sholts.
Osyǵan deıin Memleket basshysy Qasym-Jomart Toqaev Astanaǵa resmı saparmen kelgen Germanııanyń Federaldyq kantsleri Olaf Sholts Aqordada qarsy alǵanyn jazdyq.
