Germanııa men Ispanııada Reseı múddesine aqparat jınaǵan kúdiktiler ustaldy
ASTANA. KAZINFORM – Germanııanyń Soltústik Reın–Vestfalııa jerindegi Reıne qalasynda Alla S. esimdi áıel arnaıy operatsııa barysynda ustalyp, Karlsrýe qalasyndaǵy federaldyq prokýratýraǵa tapsyryldy. Tergeý nusqasyna sáıkes, ol sybaılasymen birge qarý-jaraq salasyndaǵy menedjerge qatysty tyńshylyq áreket júrgizbek bolǵan. Onyń sybaılasy Ispanııada ustalǵan. Bul týraly Euronews jazdy.
Rýmynııada týǵan 45 jastaǵy Alla S. birneshe jyl boıy eki balasymen birge Reıne qalasyndaǵy kópqabatty úıde turǵan. Ótken seısenbide ol qamaýǵa alynyp, is federaldyq prokýratýraǵa berilgen. BAQ málimetinshe, onyń balalaryn jergilikti jastar isi jónindegi áleýmettik qyzmet óz qaraýyna alǵan.
Tergeý derekterine qaraǵanda, áıel Ispanııada turyp, sol jerde ustalǵan Ýkraına azamaty sanalatyn sybaılasymen birge Ýkraınaǵa dron jetkizýmen aınalysqan nemis kásipkerin baqylaǵan. Tergeýshiler olardyń áreketi «nysanǵa qarsy jasyryn is-qımyldardyń kelesi kezeńin» – tipti qastandyq nemese fızıkalyq joıý áreketin daıyndaýmen baılanysty bolýy múmkin ekenin joqqa shyǵarmaıdy.
Kórshileriniń aıtýynsha, Alla S. turatyn úıde onsha tanymal bolmaǵan. Biraq onyń páterinen jıi aıqaı-shý estiletin. BILD basylymy kórshilerin sózge tartyp kórgen. Olardyń aıtýynsha, ol kóbine kóńilsiz júretin, baspaldaqta kezdeskende amandaspaıtyn.
Karlsrýedegi federaldyq prokýratýranyń málimetinshe, baqylaýǵa alynǵan kásipker 2025 jyldyń jeltoqsanynan bastap reseılik agentterdiń nazarynda bolǵan. Al naýryz aıynyń basynan bastap Alla S. onyń jeke úıin uıaly telefonǵa túsirip júrgen.
Tergeý organdarynyń baǵalaýynsha, kúdiktiler «tómen deńgeıli agentter» nemese «bir rettik agentter» bolýy múmkin. Mundaı adamdar arnaıy barlaý daıyndyǵynan ótpeıdi, tapsyrmalardy az aqyǵa oryndaıdy jáne kóbine kimniń tapsyrma berip otyrǵanyn nemese áreketteriniń naqty maqsatyn bilmeýi múmkin.
Eske sala keteıik, buǵan deıian Polsha Qorǵanys mınıstrliginiń qyzmetkeri Reseı paıdasyna tyńshylyq jasaǵanyn jazdyq.