Germanııa men Frantsııa ıadrolyq seriktestikti bıyl júzege asyrmaqshy
ASTANA.KAZINFORM - Frantsııa men Germanııa qaýipsizdik jáne qorǵanys salasyndaǵy yntymaqtastyqty kúsheıtýdiń alty baǵytyn jarııalady. Germanııa armııasy alǵash ret Frantsııanyń ıadrolyq tejeý kúshteriniń jattyǵýlaryna qatysady, dep habarlaıdy Euronews.
Juma kúni ótken Frantsııa-Germanııa qorǵanys jáne qaýipsizdik keńesinde Parıj ben Berlın bul saladaǵy seriktestiktiń maqsatyn kelesideı tujyrymdady: «Bizdiń elderimiz ben qurlyǵymyzdyń qaýipsizdigin nyǵaıtý jáne qarsylastarymyz úshin kóbirek belgisizdik týdyrý».
Frantsııa prezıdenti Makron bul tujyrymdamany kantsler Mertspen birlesken baspasóz máslıhatynda usyndy.
Baspasóz máslıhaty mazmundy boldy: aeroǵarysh salasy, kámeletke tolmaǵandardy zııandy onlaın kontentten qorǵaý, zeınetaqy reformalaryn jáne kapıtal naryqtaryn biriktirý máseleleri qamtyldy. Biraq taraptar ásirese qorǵanys salasyna basa nazar aýdardy.
Merts óz eliniń qarýly kúshteri Frantsııanyń ıadrolyq tejeý jattyǵýlaryna «bıyldyń ózinde» qatysatynyn málimdedi.
Eki el kóshbasshylarynyń kezdesýi Brıýldegi Shloss Aýgýstýsbýrgte ótti, onda 80 jyl buryn Konrad Adenaýer men Sharl de Goll frantsýz-german yntymaqtastyǵynyń negizin qalady.
Kantsler tarıhqa kóz júgirtip, Germanııanyń bir kezderi frantsýzdyń «ıadrolyq qolshatyrynyń» astyna kirýden bas tartqanyn eske túsirdi.
- Biz ol kezde qabyldamadyq. Sebebi biz basqa álemde ómir súrdik. Biraq búgingi álem jańa jaýaptardy talap etedi, - dep túsindirdi ol.
Nemis jáne frantsýz qarýly kúshteri alǵash ret osyndaı jattyǵýǵa birlesip qatysady.
- Bul doktrınanyń ózgerýine ákelýi múmkin. Biraq bul týraly aıtýǵa áli erte, - dep túsindirdi Germanııa kantsleri saqtyqpen.
Frantsııa prezıdenti «kez kelgen usynystarǵa ashyq» ekenin málimdedi. Sonymen birge, eki kóshbasshy da qarjylandyrý shekterin belgiledi.
- Keńeıtilgen tejeý maqsaty eshbir jaǵdaıda Frantsýz ıadrolyq arsenalyn birlesip qarjylandyrýdy kózdemeıdi, - dep túsindirdi Makron.
Buǵan deıin Qazaqstan Qytaımen ıadrolyq qaýipsizdik jáne kadr daıarlaý baǵytynda yntymaqtastyqty kúsheıtýge kelisken.
