Germanııa men Brazılııa BUU-dan elektrondyq tyńshylyq jasaýǵa tyıym salý jóninde qarar qabyldaýdy suraýda

ASTANA. 2 qarasha. QazAqparat - BUU Bas Assambleıasynan elektrondyq tyńshylyq jasaýǵa tyıym salatyn qarardy qabyldaýdy surady, dep habarlady Bı-BI-SI.

Qujatty Germanııa men Brazılııa jasap shyǵarǵan. Qarar jobasy saıası qaıratkerlerdiń jekemenshik ómirin ańdyp, oǵan aralasýǵa tyıym salyp, bul máselege birjola núkte qoıýǵa shaqyrady. Eki eldiń bıligi AQSh-tyń Brazılııa Prezıdenti Dılma Rýsef pen Germanııa kantsleri A.Merkeldiń elektrondyq poshtalaryna kirip, telefon qońyraýlaryn tyńdaý múmikindigi bolǵanyna narazylyq bildirip otyr.

Osy joba boıynsha BUU-da daýys berý qarashanyń sońyna deıin jalǵasady. Oǵan Assambleıanyń 193 múshesi qatysady. Qosa keteıik, BUU qararlary qandaı da bir mindetterdi shyǵarmaıdy, biraq olar aıtarlyqtaı tıimdi ári saıası yqpalyn tıgize alady.

Eske sala keteıik, BAQ-ta tyńshylyq jasaǵany týraly aqparatty Ortalyq barlaý basqarmasynyń burynǵy qyzmetkeri Edvard Snoýden taratqan bolatyn. Ol Amerıkanyń álem boıynsha jekelegen adamdarǵa tyńshylyq ornatqany jaıly arnaıy qyzmetterdiń qupııalaryn jarııa etti. Sonymen birge, jaqynda AQSh-tyń Ulttyq qaýipsizdik agenttiginiń 35 álem kóshbasshysynyń telefon qońyraýlaryn tyńdaǵany týraly habarlandy.