Germanııa men Avstrııa karantın merzimin uzartty
NUR-SULTAN. QazAqparat – Germanııa eldegi shekteý sharalaryn 18 sáýirge deıin uzartty. Bul týraly eldegi 16 óńirdiń basshylyǵy men bıligi dúısenbi kúni kelisti. Dárigerler sol kúni 16 myń jańa dıagnozdy tirkegen. Búkil el boıynsha aýrýǵa shaldyǵý deńgeıi árbir 100 myń adamǵa 100 oqıǵadan asyp tústi, dep habarlaıdy QazAqparat Euronews aqparattyq agenttigine silteme jasap.
Alaıda karantındi únemi uzartyp otyrý sharalary narazylyq týdyrtyp otyr. Berlın qalasynda týrıstik jáne qonaqúı salasynyń qyzmetkerleri manıfestatsııaǵa shyqty. Olar bılikten ıkemdilikti talap etýde. Osylaısha, keshe nemis bıligi Balear araldaryn qaýipti aımaqtar tiziminen alyp tastaǵan soń, nemis jurty sol jaqqa asyǵa bet aldy – olardyń kóbi demalysty týǵan elde ótkizýge daıyn ekenin, biraq ózderinde amal qalmaǵanyn ashyq aıtty.
Óz kezeginde, Eýroodaq Madrıdti shekteý sharalaryn tym qysqartpaýǵa, elge kelip jatqan týrıster aǵynyn jan-jaqty qadaǵalaýǵa shaqyrdy: qazirgi kezde Ispanııanyń túrli aımaqtary barlary áli ashyq turǵan Eýropa elderinen qonaqtardy kóptep qabyldaýda.
Osylaısha, Avstrııada shekteý sharalary burynǵydaı saqtalyp qalatynyn jarııalady.Olar áli kem degende batys Pashasy – sáýir aıynyń birinshi demalystaryna deıin uzartylady. Budan keıin Vena árbir aımaqqa karantınge qatysty sheshimdi ózdiginen qabyldaý quqyǵyn berýge ýáde etýde.
Bosnııa jurtynyń da óz úkimetiniń áreketterine kóńili tolmaı júr. Banıa-Lýkada barlar, meıramhanalar men qonaqúılerdiń ıeleri narazylyq sharalaryna shyǵyp, memlekettik kómek kórsetý talabyn bildirdi. Bosnııadaǵy jaǵdaı tym kúrdeli: elde vaktsınalaý áli bastalǵan joq, al aýrýǵa shaldyqqan adamdar sany sońǵy eki aptada kúrt ósken, aýrýhanalarda naýqastardy jatqyzatyn oryn azaıyp barady.
