Germanııa men AQSh Astanaǵa týrıst jóneltetin elderdiń bestigine kirdi

ASTANA. KAZINFORM – Astana qalasy ınvestıtsııalar jáne kásipkerlikti damytý basqarmasy basshysynyń orynbasary Nurjan Áshimov óńirlik kommýnıkatsııalar qyzmeti uıymdastyrǵan onlaın brıfıngide týrızmniń qala ekonomıkasyndaǵy róli týraly málimet berdi.

- 2025 jyldyń birinshi jartyjyldyǵynda týrızmniń qala ekonomıkasyndaǵy úlesi 6,4 paıyz boldy. Byltyr qalaǵa 1,5 mln týrıst kelgen. Bul 2023 jylmen salystyrǵanda 13 paıyz kóp. Bıyl ol kórsetkish 17 paıyz ósip, jyl aıaǵyna deıin 1,7 mln týrıst keledi degen esep bar. Elordaǵa eń kóp týrıst keletin elderdiń alǵashqy bestigine Reseı, Qytaı, Túrkııa, Germanııa jáne AQSh kiredi. Sonymen qatar áýe tasymaly 13 paıyz ósip, 9 aıda 7,1 mln adam ushaqpen qatynaǵan. Al temirjolmen 3,5 mln adam kelgen, - dedi Nurjan Áshimov.

Onyń aıtýnysha, týrızmniń basym baǵyttary retinde oqıǵalar týrızmi, iskerlik jáne medıtsınalyq týrızm aıqyndalǵan.

- Qazir iri mádenı oqıǵalarǵa erekshe kóńil bólip otyrmyz. Soǵan mysal retinde árqaısynyna 12 myń kórermen barǵan Djenıfer Lopes pen Backstreet Boys tobynyń kontsertin aıtýǵa bolady, - dedi basqarma basshysynyń orynbasary.

Eske salsaq, Májilis depýtaty Erbolat Saýryqov Premer-mınıstr Oljas Bektenovtiń atyna saýal joldap, ishki týrızmdi damytýdyń ulttyq baǵdarlamasyn qabyldaýdy usynǵan edi.