Germanııa Lıvandaǵy BUU mıssııasyn Eýroodaq kúshterimen almastyrýdy usyndy
ASTANA.KAZINFORM — Germanııa Lıvannyń ońtústigindegi halyqaralyq mıssııanyń jańa formatyn qarastyrýdy usynyp, BUU-nyń Lıvandaǵy Ýaqytsha kúshterin (UNIFIL) Eýropalyq odaq mandatymen áreket etetin kúshtermen almastyrý bastamasyn kóterdi. Bul týraly Kazinform agenttiginiń menshikti tilshisi habarlaıdy.
Reuters agenttiginiń málimetinshe, bul usynysty Germanııanyń Syrtqy ister mınıstri Iohann Vadefýl RedaktionsNetzwerk Deutschland basylymyna bergen suhbatynda aıtqan.
— Eýroodaq aıasynda UNIFIL mıssııasy aıaqtalǵannan keıin qaýipsizdik salasynda vakýým týyndamaýy úshin eýropalyq mandat negizindegi mıssııany qamtamasyz ete alamyz ba degen máseleni qarastyrýymyz kerek, — dedi Germanııa SІM basshysy.
Onyń aıtýynsha, mundaı mıssııa Izraıl armııasynyń Lıvannan shyǵarylýyna jáne «Hezbollanyń» qaıta oralýyna jol bermeýge yqpal etýi múmkin.
Lıvandaǵy BUU-nyń Ýaqytsha kúshteriniń (UNIFIL) mandaty 2026 jylǵy 31 jeltoqsanda aıaqtalady. Birneshe apta buryn Germanııa parlamenti el kontıngentiniń osy operatsııaǵa qatysý merzimin sońǵy ret uzartqan bolatyn.
Germanııanyń bastamasy AQSh-tyń deldaldyǵymen Izraıl men Lıvan arasynda jalǵasyp jatqan kelissózder aıasynda kóterildi.
Osy aptada Rımde Izraıl áskerin Lıvannyń ońtústiginen shyǵarý jáne «Hezbollany» qarýsyzdandyrý máselelerine arnalǵan elshiler deńgeıindegi tikeleı kelissózderdiń altynshy kezeńi aıaqtaldy.
Buǵan qosa, shilde aıynyń ortasynda Lıvanǵa Qazaqstannyń 11 áskerı qyzmetshiden turatyn kezekti bitimgerlik kontıngenti barǵan bolatyn.
