Germanııa qosymsha taǵy 10 myń bosqyndy qabyldaıdy
BRıÝSSELЬ. QazAqparat - Germanııa Eýropalyq odaqtyń bosqyndardy ornalastyrý baǵdarlamasy boıynsha Soltústik Afrıka men Taıaý Shyǵystan kelgen qosymsha 10 myń mıgrantty qabyldaıdy. Bul týraly «QazAqparat» HAA-nyń menshikti tilshisi, Eýropa Odaǵynyń mıgratsııa jáne ishki ister jónindegi komıssary Dımıtrıs Avramopýlos Funke basylymyna bergen suhbatyndaǵy málimdemesine silteme jasap habarlaıdy.
Onyń aıtýynsha, osy aptada Eýrokomıssııaǵa GFR úkimetiniń osy máselege sáıkes senimhaty jetkizilgen.
«Nemis úkimeti másele halyqaralyq yntymaqtastyqqa kelgen kezde, toqtaýsyz eńbek etedi», - deıdi Avramopýlos myrza.
Eýrokomıssardyń bergen málimetine oraı, Eýropalyq odaqtyń ózge elderi taǵy 40 myń bosqyndy qabyldaýǵa mindettelgenin eskersek, kóshi-qon baǵdarlamasy josparynan artyq nátıjeni kórsetpek.
Aıta ketsek, qorǵanyssyz bosqyndardy ornalastyrý baǵdarlamasy olardyń Eýropaǵa qaýipsiz jetýi úshin bekitilgen bolatyn. 2019 jyldyń kúzine qaraı Eýropalyq odaq osy baǵdarlama aıasynda kem degende 50 myń bosqyndy qabyldap úlgerýi tıis.
