Germanııa qorǵanysqa 100 mlrd eýro bólmek

NUR-SULTAN. QazAqparat – Germanııanyń basqarýshy koalıtsııasy oppozıtsııamen armııany jańǵyrtý maqsatyna 100 mlrd eýro bólýge kelisti. Ol úshin Germanııada sonyń ishinde sońǵy qarýlarǵa iri tapsyrysty qarjylandyratyn arnaıy qor qurylady. Bul týraly QazAqparat euronews aqparat agenttigine silteme jasap habarlaıdy.

«Mundaǵy negizgi maqsat – nemis armııasynyń qorǵanys qabiletin arttyrý arqyly eldiń bostandyǵy men demokratııasyn qorǵaý», - dep málimdedi Germanııa kantsleri Olaf Sholts.

Ol qorǵanys shyǵyndarynyń aqpan aıynyń sońynan bastap ulǵaıǵanyn habarlady. Onda Sholts nemis bıligi ulttyq JІÓ-niń 2%-dan astamyn Býndesverge ınvestıtsııalaıdy dep ýáde berdi. Germanııa úkimeti ol úshin 2022 jylǵa arnalǵan memlekettik bıýdjetinen 100 mlrd eýro bólýge daıyn. Jeksenbide ótken úsh saǵattyq talqylaýdan keıin buǵan Hrıstıan-demokratııalyq odaǵy men Hrıstıan-áleýmettik odaǵynyń oppozıtsııalyq konservatıvti blogy da kelisti. Arnaıy qordy qosymsha nesıeler esebinen qarjylandyrý josparlanyp otyr. Bul Germanııa konstıtýtsııasyna ózgerister engizýdi talap etedi, óıtkeni Negizgi zań bıýdjetten túsetin qarajattan kóbirek jumsaýǵa tyıym salady. Óz kezeginde konstıtýtsııaǵa túzetýlerdi qabyldaý úshin Býndestag pen Býndesrat depýtattarynyń úshten ekisiniń qoldaýy qajet. Oppozıtsııa daýysynsyz basqarýshy koalıtsııa túzetýlerdi qabyldaı almas edi.

Qyrǵı qabaq soǵys aıaqtalǵannan keıin Germanııa 1990 jyly armııasynyń sanyn shamamen 500 myń damnan búginde 200 myńǵa deıin qysqartqan bolatyn.