Germanııa, Koreıa, Aýstralııa mamandary Qazaqstannyń jer qoınaýyn zertteıdi
ASTANA. KAZINFORM — Qazaqstan Germanııa, Ońtústik Koreıa jáne Aýstralııamen strategııalyq mańyzy bar materıaldar óndirisi salasynda yntymaqtastyqty damytyp jatyr. Bul týraly Úkimette ótken brıfıngte Premer-mınıstrdiń birinshi orynbasary Nurlybek Nálibaev málimdedi.
Onyń aıtýynsha, elimizde sheteldik ınvestorlardyń qatysýymen júzege asyrylatyn jobalar toptamasy jasaqtalǵan.
Olar tórt baǵytty — akkýmýlıatorǵa qajetti materıaldar óndirý, reaktıvti qozǵaltqyshtardyń bólshekterine arnalǵan materıaldardy qaıta óńdeý jáne shyǵarý, jartylaı ótkizgishter ónerkásibin damytý jáne turaqty magnıtter óndirýdi qamtıdy.
— Germanııanyń Bergbau AG kompanııasymen, Koreıanyń geologııalyq-geofızıkalyq zertteýler jáne mıneraldyq resýrstar ınstıtýtymen, Aýstralııanyń Lindian Resources Limited kompanııasymen jáne basqa da uıymdarmen yntymaqtastyq júzege asyrylyp jatyr, — dedi Nurlybek Nálibaev.
Memleket basshysynyń geologııa salasy boıynsha tapsyrmasyn oryndaý maqsatynda jer qoınaýyn ozyq tehnologııalardy qoldaný arqyly zertteý júrgizilip jatyr. Elimizde alǵash ret 1:50 000 masshtabyndaǵy memlekettik geologııalyq túsirilim jumystary bastaldy.
— Aldaǵy úsh jylda shamamen 100 myń sharshy shaqyrym aýmaqta 20 jobany iske asyrý josparlanyp otyr. Qazirdiń ózinde 7 nysannyń perspektıvalylyǵy týraly aldyn ala derekter alyndy. Perspektıvalylyǵy rastalǵan ýchaskelerdi kelesi jyly aýktsıonǵa shyǵarylady, — dedi vıtse-premer.
Buǵan deıin Nurlybek Nálibaev Qazaqstanda salynyp jatqan úsh jańa áýejaı qurylysyna qansha qarajat bólingenin aıtty.
2029 jylǵa deıin 13,3 GVt bolatyn jańa energııa nysandaryn iske qosý josparlanyp otyr.
