Germanııa kóne altyn betperdeni Perýge qaıtaratyn boldy
BRıÝSSELЬ. QazAqparat - 19 jylǵa sozylǵan sot protsesinen keıin Germanııa on úshinshi ǵasyrda altynnan jasalǵan jerleý rásimine arnalǵan betperdeni Perýge qaıtardy, dep habarlaıdy «QazAqparat» HAA menshikti tilshisi.
Sıkan mádenıetine tán óner týyndysyn Bavarııa bıligi beısenbi kúni Berlındegi Perý elshiligine berdi.
«Sıkan betperdesi máselesindegi qamqorlyǵy úshin Germanııa úkimetine rızamyn. Bizdiń zamanymyzǵa deıin 1200 jyl buryn jasalǵan betperde bizdiń mádenı muralarymyzdyń biri», - dep jazdy Perý mádenıet mınıstri Patrısııa Balbýena Týıtterdegi paraqshasynda.
Perý Sıkan betperdesiniń joǵalǵany týraly 1999 jyly málimdegen bolatyn. Sol jyly qundy jádigerdi Interpol Vısbaden qalasynda tárkilegen. Mıýnhen soty betperdeni Perýge qaıtarý týraly 2016 jyldyń jeltoqsanynda sheshim qabyldaǵan.
Sıkan mádenıeti ınkter memleketinen buryn, VIII - XIV ǵasyrlar aralyǵynda qazirgi Perýdiń soltústik jaǵalaýlarynda ómir súrdi.
Mystan, altynnan jasalǵan jerleý rásimine arnalǵan betperdeler sıkandar qoǵamynyń bedeldi tulǵalarynyń qorymdarynan tabylǵan.
Jekemenshik nemis kollektsııasynan Kolýmbqa deıingi 13 qundy murany qaıtarýǵa qol jetkizgen Ekvador sekildi Perý de óz mádenı murasyn qaıtarýǵa kúsh saldy.
