Germanııa kontserni SQO-da kombaın qurastyrady

NUR-SULTAN. QazAqparat – Germanııanyń CLAAS transulttyq kompanııasy Soltústik Qazaqstan oblysynda alǵashqy kombaındardy qurastyrýǵa daıyn, dep habarlaıdy QazAqparat.

Aımaq basshysy Qumar Aqsaqalovtyń aıtýynsha, bir jarym jyl buryn qurylǵan «Qyzyljar» arnaıy ekonomıkalyq aımaǵynda 3 iri ınvestıtsııalyq joba júzege asyrylyp jatyr.

«Kúzde elektrotehnıka zaýytyn iske qosý josparlanǵan. Qazirdiń ózinde 300 adam jumysqa qabyldandy. Nysannyń ónimderi eksportqa shyǵarylady. Bizge CLAAS transulttyq kompanııasy keldi. Bıyl nemis kontserni alǵashqy kombaındardy qurastyrady. Álemdik kóshbasshy tehnıkany qurastyrý arqyly sharýalarǵa arnalǵan kombaınnyń qunyn eki ese azaıtsaq dep otyrmyz», - dedi ákim.

Sondaı-aq, ol arnaıy ekonomıkalyq aımaqqa reseılik ınvestorlar da kirgenin aıtty.

«Máskeýdegi «Velfarm» kompanııasymen Petropavlda zaýyt salý týraly kelisimdi bekittik. Olar bul iske 15 mlrd teńge salýǵa daıyn. Jalpy, oblysta 75 jobanyń pýly jasaqtaldy, ınvestıtsııalar kólemi –1,8 trln teńge», - dedi Qumar Aqasaqalov.