Germanııa kompanııasy Qazaqstannyń kómir jobalaryna qatysýǵa qyzyǵýshylyq tanytty
ASTANA. KAZINFORM - Qazaqstan Respýblıkasy Energetıka vıtse-mınıstri Sanjar Jarkeshov Germanııa Federatıvtik Respýblıkasynyń Ekonomıka jáne energetıka federaldyq mınıstrliginiń stats-hatshysy Shtefan Rýnhoffpen kezdesti, dep habarlaıdy QR Energetıka mınıstrliginiń baspasóz qyzmeti.
Kezdesý barysynda taraptar Qazaqstan men Germanııa arasyndaǵy energetıka salasyndaǵy yntymaqtastyqtyń qazirgi jaǵdaıy men damý perspektıvalaryn talqylap, jahandyq energetıkalyq qaýipsizdiktiń ózekti máseleleri jáne álemdik naryqtardy energııa resýrstarymen turaqty qamtamasyz etý jóninde pikir almasty.
Munaı salasyndaǵy ózara is-qımyl máselelerine erekshe nazar aýdaryldy.
Taraptar Qazaqstan munaıyn Germanııaǵa jetkizý boıynsha yntymaqtastyqtyń qazirgi jaı-kúıi men ony odan ári damytý perspektıvalaryn qarastyryp, energetıkalyq áriptestiktiń senimdiligin qamtamasyz etýdiń mańyzdylyǵyn atap ótti.
Kómir salasy boıynsha Germanııa bıznesiniń ókilderi Koch Solutions kompanııasynyń tehnologııalyq sheshimder men jabdyqtardy jetkizý arqyly Qazaqstannyń kómir kásiporyndaryndaǵy jobalarǵa qatysýǵa qyzyǵýshylyq tanytyp otyrǵanyn habarlady.
Qazaqstan tarapy tıisti usynystardy qarastyrýǵa daıyn ekenin rastap, kómir ónerkásibi men kómir hımııasy salasyna zamanaýı tehnologııalardy tartýǵa múddeli ekenin jetkizdi. «Jasyl» sýtegi jobalary boıynsha taraptar yntymaqtastyqty odan ári damytýǵa ózara qyzyǵýshylyqtaryn rastady.
Qazaqstan tarapy jobany iske asyrýǵa daıyn ekenin jáne ony damytý úshin barlyq qajetti alǵysharttardyń bar ekenin atap ótti.
Kezdesý qorytyndysy boıynsha taraptar energetıka salasyndaǵy ekijaqty yntymaqtastyqty odan ári nyǵaıtýǵa jáne konstrýktıvti dıalogty damytýǵa ózara múddelilikterin rastady.
Osyǵan deıin Germanııanyń Qazaqstan ekonomıkasyna ınvestıtsııasy 28,5 paıyzǵa óskeni týraly jazdyq.
