Germanııa kınoteatrlarynda «Qunanbaı» fılmi kórsetildi

BERLIN. QazAqparat - Qazaqtyń uly aqyny, aǵartýshysy jáne qazaq ádebıetiniń klassıgi Abaıdyń 175-jyldyǵyna arnalǵan is-sharalar serııasynyń jalǵasy retinde Qazaqstan Elshiligi Berlındegi tanymal «Zoo Palast» kınoteatrynda «Qunanbaı» tarıhı kınodramasynyń kórsetilimin uıymdastyrdy, dep habarlaıdy QazAqparat QR SІM baspasóz qyzmetine silteme jasap.

Birqatar syılyqtarǵa ıe bolǵan fılmde Qazaqstan men qazaq halqyn óz týyndylarymen álemge pash etken hákim Abaıdyń ákesi – Qunanbaıdyń ómiri men qyzmeti týraly baıandalady.

Fılmniń tusaýkeserinde Elshi Dáýren Káripov «Qazaq kitaphanasy» jobasy aıasynda Elshilik nemis baspalarymen birlese otyryp basyp shyǵarǵan aqynnyń nemis tilindegi shyǵarmalary men óshpes murasy týraly aıtyp berdi.

Sondaı-aq, kınokórsetilim aıasynda jınalǵan nemis saıasatkerleri men sarapshylaryna, qoǵam qaıratkerlerine, jýrnalısterge jáne Berlın turǵyndaryna ótken tamyz aıynda Germanııada Qazaqstannyń Mádenıet jáne sport mınıstrligi men «Ulttyq aýdarma bıýrosy» Qoǵamdyq qory jobasy aıasynda jaryq kórgen aqynnyń nemis tilindegi «Abaı» atty shyǵarmalarynyń jańa jınaǵy tanystyryldy.

Іs-shara sanıtarlyq-epıdemıologııalyq talaptar men áleýmettik qashyqtyq normalaryn saqtaı otyryp ótkizildi.