Germanııa qymyzdy patenttep aldy ma – Ádilet mınıstrliginiń jaýaby
Germanııada qymyzǵa emes, ony óndirý ádisterine ǵana patent bar. Bul týraly Ádilet mınıstrliginiń resmı ókili Talǵat Ýálı aıtty, dep habarlaıdy Kazinform.
«Qazir qoǵamda dástúrli sýsynymyz – qymyzǵa qatysty alyp-qashpa áńgimeler kóp. Tipti keıbir aqparat quraldarynda qymyzdy Germanııa patenttep alypty degen áńgime de bar. Osy oraıda Germanııada qymyz ben bıe sútine, ıaǵnı saýmalǵa eshkim patent almaǵanyn atap ótkim keledi. Iá, shynynda da, Germanııada patentter bar, biraq qymyzǵa emes, ony óndirý ádisterine ǵana. Qymyz Germanııaniki degen túsinik esh ýaqytta bolmaıdy. Óıtkeni, qymyz tek Qazaqstanda emes, Ortalyq Azııa elderinde óndiriledi. Ol bir eldiń ónimi dep patenttelmeıdi», - dedi Talǵat Ýálı.
Resmı ókildiń atap ótýinshe, Germanııada qymyzdyń qurǵaq untaǵynan kapsýla nemese túıirshiktelgen túrlerin jasaýǵa patent berilgen.
«Al Qazaqstanda ulttyq ótinim óndirýshilerge qymyzdyń ózine emes, tabletkadaǵy qymyzǵa, sondaı-aq keptirilgen bıe sútine, ıaǵnı óndirý ádisterine patent berildi», - dedi ol.
