Germanııa Qazaqstannyń BUU Adam quqyqtary keńesine múshelikke ótýin qoldady

NUR-SULTAN. QazAqparat – GFR elimizdiń BUU Adam quqyqtary jónindegi keńesine múshelikke ótýine qoldaý tanytty. Bul týraly QR Syrtqy ister mınıstriniń orynbasary Roman Vasılenko málim etti, dep habarlaıdy QazAqparat tilshisi.

«Búgingi kezdesýde adam quqyqtary men bostandyqtaryn qamtamasyz etýge jáne demokratııalyq qoǵam qurýda Qazaqstandaǵy demokratııalyq reformalardyń kún tártibi talqylandy. Nemis tarapy osy saladaǵy dáıekti bastamalardy iske asyrý barysymen, onyń ishinde azamattyq qoǵamdy nyǵaıtý, zań ústemdigin qamtamasyz etý jáne qańtardaǵy qaıǵyly oqıǵalardan keıin azamattardyń áleýmettik-ekonomıkalyq ál-aýqatyn jaqsartý mánmátinimen tanysty. QR SІM basshylyǵy atynan Germanııaǵa 2022-2024 jyldarǵa arnalǵan BUU Adam quqyqtary jónindegi keńesine múshelikke qazaqstandyq ótinimdi qoldaǵany úshin erekshe alǵysymdy bildirgim keledi», - dedi Roman Vasılenko mınıstrlikte ótken baspasóz máslıhatynda.

Vıtse-mınıstrdiń aıtýynsha, Germanııa - Qazaqstannyń jetekshi syrtqy ekonomıkalyq áriptesi.

Jáne Qazaqstan Ortalyq Azııa óńirindegi nemis bıznesi úshin basty naryq bolyp otyr.

«Búginde Qazaqstan men GFR arasynda 35-ten astam kelisim jumys isteıdi. Atalǵan kelisimderge Memleket basshysynyń 2019 jylǵy jeltoqsanda jáne 2020 jylǵy aqpanda Germanııaǵa sapary barysynda qol jetti. Nemis ınvestorlarymen jumys jónindegi úkimettik jumys toby, Berlın Eýrazııalyq klýby jáne saýda-ekonomıkalyq yntymaqtastyq jónindegi úkimetaralyq jumys toby sııaqty qazaq-german ekonomıkalyq dıplomatııa ınstıtýttary jemisti jumys istep jatyr», - deıdi ol.