Germanııa Qazaqstanmen yntymaqtastyqty nyǵaıtýǵa múddeli
ORAL. QazAqparat - Germanııa Federatıvti Respýblıkasynyń Almaty qalasyndaǵy bas konsýly Iorn Rozenberg bastaǵan delegatsııa Batys Qazaqstan oblysynda boldy, dep habarlaıdy «QazAqparat» tilshisi.
Sapar barysynda bas konsýl oblys ákimi Altaı Kólginovpen kezdesip, taraptar ekonomıka jáne basqa da salalardaǵy yntymaqtastyqty damytý máselelerin talqylady.
Kezdesýde óńir basshysynyń atap ótkenindeı, qazirgi tańda memleket sheteldik ınvestorlar úshin kóptegen múmkindikterge jol ashyp otyr. Elbasynyń taıaýda Sochıde Germanııanyń jetekshi kásipkerlerimen bas qosqany belgili. Osy oraıda batysqazaqstandyq kásiporyndar da nemis kompanııalarymen burynnan bar baılanysty keńeıte túsýge yqylasty. Oblystyń Eýropa memleketterimen, sonyń ishinde Germanııamen taýar aınalymy ulǵaıa tússe, budan eki jaq ta utady. Eń bastysy, qazaqstandyq jáne germanııalyq kásipkerlerdiń ózara tájirıbe almasyp, iskerlik qarym-qatynas jasaýyn jalǵastyra berý kerek. Batysqazaqstandyqtar nemis kásiporyndarymen birlesip jumys jasaýǵa daıyn. Oralda «Kvant» JShS, úı qurylysy kombınaty sekildi kásiporyndar óz óndirisinde ozyq nemis tehnologııalaryn paıdalanýda. Sonymen qatar Oral men Magdebýrg qalalary arasynda da jaqsy baılanys ornyqqan.
Bas konsýldyń sózine qaraǵanda, ekijaqty qarym-qatynastar saıası, ekonomıkalyq, mádenı, ǵylymı, ıaǵnı barlyq salalardy qamtıdy.
«Biz yntymaqtastyqty nyǵaıtýǵa múddelimiz. Seriktestik te joǵary deńgeıde damyp keledi. Qazaqstan Prezıdenti Nursultan Nazarbaev Germanııada birneshe ret boldy. Germanııalyq saıasatkerler de Qazaq jerine aıaq basty. Bıyl Germanııa kantsleri Angela Merkel Astanadaǵy «EKSPO-2017» kórmesinde boldy. Men ózim Qazaqstanda 15 aıdan beri qyzmet etip kelemin. Bul - Batys Qazaqstanǵa birinshi saparym. Maqsatymyz - kásiporyndar men oqý oryndarynda bolyp, óńirdiń ınvestıtsııalyq múmkindikterimen tanysý», - dedi Iorn Rozenberg.
