Germanııa kantsleri Úndistanǵa memlekettik saparmen bardy
ASTANA. KAZINFORM - Germanııa úkimetiniń basshysy Úndistanda memlekettik saparmen júr.
Germanııa kantsleri Olaf Sholts, vıtse-kantsler Robert Habek jáne mınıstrler kabınetiniń jartysy elge úkimetaralyq konsýltatsııalar ótkizý úshin keldi.
- Juma kúni Germanııa úkimeti men Úndistan premer-mınıstri Narendra Modı úkimeti negizinen qorǵanys saıasaty salasynda kóptegen kelisimderge qol qoıdy, dep jazady Bild.
O.Sholts pen Germanııanyń syrtqy ister mınıstri Annalena Barbok Úndistannyń Batyspen baılanysyn nyǵaıtýǵa umtylýda.
Nemis delegatsııasynyń Delıge resmı saparymen qatar nemis bıznes qaýymdastyǵy men Germanııa úkimeti uıymdastyratyn, Germanııanyń Azııa elderimen ekonomıkalyq qarym-qatynastaryn talqylaıtyn turaqty is-shara – Nemis bıznesiniń Azııa-Tynyq muhıty konferentsııasy ótýde.
Bıyl bıznes qaýymdastyǵy bir maqsatty erekshe atap ótti: ol - Úndistanmen erkin saýda týraly kelisimge qol jetkizý.
Germanııa kantsleri kelisimge jaqyn arada qol jetkizýge bolatynyn aıtty: «Bul tek birneshe aıǵa sozylýy múmkin», - dedi ol.
Germanııanyń Ekonomıka mınıstri Habek: «Mundaı kelisim eki jaqtyń aldynda turǵan qıyndyqtarǵa durys jaýap bolar edi», - dep qosty.
1,4 mıllıard halqy bar Úndistannyń ekonomıkasy qarqyndy damyp keledi, al Germanııa ekonomıkalyq qıyndyqtarǵa tap boldy.
GTAI málimetteri boıynsha, Úndistannyń jalpy ishki ónimi 2027 jylǵa qaraı Germanııany basyp ozady.
Sonymen qatar Germanııaǵa bilikti sheteldik mamandar qajet. Úndistannyń eńbek naryǵyna aı saıyn mıllıondaǵan adamdar kiredi. Germanııanyń Eńbek mınıstri Hýbertýs Heıldiń bul sapardan úmiti zor.
Ol rbb24 Inforadio-da Germanııanyń Úndistanda jaqsy bedelge ıe ekenin atap ótti. Úndistannyń jas mamandary «búkil álemde, ásirese IT jáne densaýlyq saqtaý salasynda suranysqa ıe», - dedi ol.
Sonymen qatar, úndi stýdentteri Germanııa ýnıversıtetterindegi eń úlken sheteldik topty quraıdy. Germanııanyń bilim mınıstri Bettına Stark-Vattsınger Úndistanda nemis elıtalyq ýnıversıtetterin alǵa jyljytýdy josparlap otyr.
