Germanııa kantsleri Tramptyń saýda saıasatyna qarsy shara qoldanatynyn eskertti

ASTANA. KAZINFORM – Germanııa kantsleri Frıdrıh Merts AQSh-tyń joǵary tarıfterine jaýap retinde Eýroodaqtyń qatań shara qoldanýǵa daıyn ekenin málimdedi. Bul týraly DW basylymy habarlaıdy.

— AQSh bıligi Tramptyń «shamadan tys joǵary» tarıfterine Eýroodaqtyń aına-qatesiz jaýap berýge daıyn ekenin elemeı qoıýyna bolmaıdy. Biz kelissózder arqyly máseleni sheshýge múddelimiz, biraq qajet bolsa, naqty qadamdarǵa baramyz, — dedi Merts Germanııanyń Bavarııa aımaǵy úkimetimen kezdesýden keıin Tsýgshpıttse taýynda sóılegen sózinde.

Frıdrıh Mertstiń aıtýynsha, EO AQSh-tan ımporttalatyn ushaqtar men kólikterge joǵary baj salyǵyn engizýi múmkin.

Kantsler Merts bul baǵytta AQSh prezıdenti Donald Tramppen jáne Eýropalyq komıssııa tóraǵasy Ýrsýla fon der Lıaıenmen turaqty baılanysta ekenin atap ótti.

— Basty maqsatymyz — AQSh-pen saýdany jeńildetetin jáne tarıfterdi qaıta tómendetýge múmkindik beretin sheshimge jedel qol jetkizý. Bizde kelissóz júrgizýge shilde aıynyń sońyna deıin ýaqyt bar, — dedi ol.

Sondaı-aq kantsler EO Tramp 12 shildede baj salyǵyn engizetini jóninde habarlaǵannan keıin birden qarsy sharalarǵa barmaı turýy úshin ózi birneshe kún boıy jumys júrgizgenin jetkizdi.

— Áıtpese keshe avtomatty túrde jaýapty baj salyǵy engiziler edi, — dedi Germanııa úkimetiniń basshysy.

Eske sala keteıik, 2 sáýirde AQSh prezıdenti Donald Tramp 185 el men aýmaqtan jetkiziletin ónimderge kedendik tarıf engiziletinin málimdegen bolatyn. Jalpyǵa ortaq 10 paıyzdyq tarıf 5 sáýirden bastap kúshine ense, jekelegen tarıfter 9 sáýirden qoldanysqa endi. Sol kúni Aq úı ákimshiligi saýda kelissózderine baılanysty birqatar qarsy sharanyń 90 kúnge toqtatylatynyn habarlady. Bul kezeńde barlyq elder úshin 10 paıyzdyq biryńǵaı tarıf qoldanylady.

27 maýsymda Tramp AQSh shamamen bir jarym apta ishinde jekelegen kelisim jasalmaǵan elderge jańa tarıf talaptaryn joldaıtynyn málimdedi. Osyǵan baılanysty Eýroodaq Tramp engizgen tarıfterge jaýap retinde qarsy sharalardy qarastyrýy múmkin ekenin joqqa shyǵarmady.