Germanııa kantsleri klımattyń ózgerýin talqylaý úshin Brazılııaǵa bardy

ASTANA. KAZINFORM – Germanııa kantsleri Frıdrıh Merts Brazılııanyń Belen qalasynda ótetin COP klımattyq konferentsııasyna bardy. Onda álemdik kóshbasshylar klımatty qorǵaý jáne Amazonııanyń tropıkalyq ormandaryn saqtaý boıynsha jahandyq sharalardy talqylaıdy, dep habarlaıdy BILD. 

Sammıttiń negizgi taqyryby Brazılııa prezıdenti Lýıs Inasıý Lýla da Sılvanyń bastamasymen qurylǵan Amazonkany qorǵaýǵa arnalǵan jańa halyqaralyq qor boldy. Bul qor ormandardy saqtaıtyn elderdi qoldaýǵa jáne ormandardyń joıylýyna baqylaýdy kúsheıtýge baǵyttalǵan.

Brazılııanyń kútkenine qaramastan, Germanııa qorǵa qatysý úshin naqty qarjylyq mindettemeler bergen joq. Frıdrıh Merts Germanııanyń ǵalamshar klımatyn jalǵyz ózi qutqara almaıtynyn málimdep, birlesken halyqaralyq is-qımyl qajettigin atap ótti.

- Klımattyq beıtaraptyqqa tek Germanııa qol jetkizse, bul maǵynasyz. Tipti búgin qol jetkizsek te, eshteńe ózgermeıdi, - dep atap ótti Merts.

Brazılııa men Indonezııa jańa qorǵa árqaısysy 1 mlrd dollardan bólýge ýáde berdi, al Ulybrıtanııa óz jarnasyn daıyndap jatyr. Alaıda Germanııa qoldaý sózderimen shektelip, federaldy bıýdjet áli bekitilmegenin jáne qarjylandyrý úlesi áli belgisiz ekenin túsindirdi.

Osy arada BUU klımattyq táýekelderdiń artýy týraly eskertip otyr. Bas hatshy Antonıý Gýterrısh shyǵaryndylardy azaıtýdyń qazirgi qarqynymen jahandyq temperatýra ǵasyrdyń sońyna qaraı 2,8°C-qa kóterilýi múmkin ekenin, al Parıj kelisiminiń maqsaty bul ósimdi 1,5°C-tan aspaıtyndaı etip shekteý ekenin málimdedi.

Buǵan deıin BUU Bas hatshysy Antonıý Gýterrısh BUU Bas Assambleıasynyń 80-sessııasynyń ashylýynda sóılegen kirispe sózinde adamzat klımattyq ádilettilikti tańdaýy tıis ekenin aıtty.

Al Ystanbul klımattyq qaýipterge qarsy sharalardy kúsheıtpek ekenin jazǵan bolatynbyz.